ബ്രസീലിയൻ താരങ്ങൾ തിളങ്ങി, ജയത്തോടെ റയൽ മാഡ്രിഡ്‌ മുന്നോട്ട്!

ഇന്നലെ ലാലിഗയിൽ നടന്ന മത്സരത്തിൽ റയൽ മാഡ്രിഡിന് വിജയം. എതിരില്ലാത്ത രണ്ടു ഗോളുകൾക്കാണ് റയൽ മാഡ്രിഡ്‌ ഗെറ്റാഫെയെ പരാജയപ്പെടുത്തിയത്. നിർണായകമായ മത്സരത്തിൽ റയൽ മാഡ്രിഡിന് വേണ്ടി കരിം ബെൻസിമ, ഫെർലാന്റ് മെന്റി എന്നിവരാണ് ഗോളുകൾ നേടിയത്. ബ്രസീലിയൻ താരങ്ങളായ വിനീഷ്യസ്, മാഴ്‌സെലോ എന്നിവർ ഗോളിന് വഴിയൊരുക്കി കൊണ്ട് മികച്ചു നിന്നു.മത്സരത്തിലെ രണ്ടാംപകുതിയിലാണ് ഈ രണ്ടു ഗോളുകളും പിറന്നത്. റയൽ മാഡ്രിഡ് പരിശീലകൻ സിനദിൻ സിദാന് ഏറെ ആശ്വാസം നൽകുന്നതാണ് ഈ വിജയം. കഴിഞ്ഞ മത്സരത്തിൽ ഹുയസ്ക്കയെ പരാജയപ്പെടുത്താൻ റയൽ മാഡ്രിഡിന് കഴിഞ്ഞിരുന്നു.

മത്സരത്തിന്റെ അറുപതാം മിനിറ്റിലാണ് കരിം ബെൻസിമയുടെ ഗോൾ വരുന്നത്.ബ്രസീലിയൻ താരം വിനീഷ്യസ് ജൂനിയറാണ് അസിസ്റ്റ് നൽകിയത്.കേവലം ആറ് മിനിറ്റുകൾക്ക് ശേഷം ഫെർലാന്റ് മെന്റിയും ഗോൾ നേടി.ഇത്തവണ മറ്റൊരു ബ്രസീലിയൻ താരം മാഴ്‌സെലോയാണ് അസിസ്റ്റ് നൽകിയത്. ജയത്തോടെ റയൽ മാഡ്രിഡ്‌ പോയിന്റ് ടേബിളിൽ രണ്ടാം സ്ഥാനത്തേക്ക് കയറി.22 മത്സരങ്ങളിൽ നിന്ന് 46 പോയിന്റാണ് റയൽ മാഡ്രിഡിനുള്ളത്. 20 മത്സരങ്ങളിൽ നിന്ന് 51 പോയിന്റുള്ള അത്ലെറ്റിക്കോയാണ് ഒന്നാമത്.