ബാഴ്സയെ പിടിച്ചു കെട്ടി ലെവാന്റെ, മെസ്സിപ്പടയുടെ പ്രതീക്ഷകൾ അസ്തമിക്കുന്നു!

ഇന്നലെ ലാലിഗയിൽ നടന്ന മത്സരത്തിൽ കരുത്തരായ ബാഴ്സക്ക് സമനിലപ്പൂട്ട്. ലെവാന്റെയാണ് ബാഴ്‌സയെ സമനിലയിൽ തളച്ചത്.3-3 എന്ന സ്കോറിനാണ് ബാഴ്‌സ ലെവാന്റെയോട് സമനില വഴങ്ങിയത്. ഒരു ഘട്ടത്തിൽ വിജയമുറപ്പിച്ചിരുന്ന ബാഴ്സ പിന്നീട് ജയം കളഞ്ഞു കുളിക്കുകയായിരുന്നു. ഈ സമനിലയോടെ ബാഴ്സയുടെ കിരീടപ്രതീക്ഷകൾ അസ്തമിച്ചു വരികയാണ്. നിലവിൽ മാഡ്രിഡ്‌ ടീമുകൾക്കാണ് കാര്യങ്ങൾ അനുകൂലമായി കൊണ്ടിരിക്കുന്നത്. നിലവിൽ 36 മത്സരങ്ങളിൽ നിന്ന് 76 പോയിന്റാണ് ബാഴ്‌സക്കുള്ളത്.ഒരു മത്സരം കുറച്ചു കളിച്ച അത്ലറ്റിക്കോക്ക് 77 പോയിന്റും റയലിന് 75 പോയിന്റുമാണ് ഉള്ളത്.

മത്സരത്തിന്റെ ഇരുപത്തിയഞ്ചാം മിനുട്ടിൽ ലയണൽ മെസ്സിയാണ് ബാഴ്‌സയുടെ ആദ്യഗോൾ നേടുന്നത്.34-ആം മിനുട്ടിൽ ബാഴ്‌സ വീണ്ടും ലീഡുയർത്തി.ഡെംബലെയുടെ അസിസ്റ്റിൽ നിന്ന് പെഡ്രിയാണ് ഗോൾ നേടിയത്. ഈ രണ്ട് ഗോളിന്റെ ബലത്തിൽ ജയം നേടാനാവുമെന്നായിരുന്നു ബാഴ്സയുടെ വിശ്വാസം. എന്നാൽ രണ്ടാം പകുതിയിൽ കാര്യങ്ങൾ മാറിമറിഞ്ഞു.57-ആം മിനിറ്റിൽ ഗോൺസാലോ മെലേറോയും 59-ആം മിനുട്ടിൽ ലൂയിസ് മൊറാലസും ലെവാന്റെക്ക് വേണ്ടി ഗോളുകൾ നേടുകയായിരുന്നു.എന്നാൽ 64-ആം മിനുട്ടിൽ ഗോൾ നേടിക്കൊണ്ട് ഡെംബലെ ബാഴ്‌സക്ക് വിജയപ്രതീക്ഷകൾ ജനിപ്പിച്ചു.എന്നാൽ 83-ആം മിനുട്ടിൽ സെർജിയോ ലിയോൺ ലെവാന്റെക്ക് വേണ്ടി സമനില ഗോൾനേടിയതോടെ നിർണായകമായ രണ്ട് പോയിന്റുകളാണ് ബാഴ്‌സക്ക് നഷ്ടമായത്.