ബാഴ്സക്ക് വേണ്ടി കളിക്കണം:മെസ്സിഞ്ഞോ.

നിരവധി യുവ പ്രതിഭകൾ വളർന്നുവരുന്ന രാജ്യമാണ് സൗത്ത് അമേരിക്കൻ വമ്പൻമാരായ ബ്രസീൽ.വിറ്റോർ റോക്ക്,എൻഡ്രിക്ക് എന്നിവരൊക്കെ ബ്രസീലിന്റെ ഭാവി വാഗ്ദാനങ്ങളാണ്.ബാഴ്സയും റയൽ മാഡ്രിഡും അവരെ സ്വന്തമാക്കി കഴിഞ്ഞു.ഇവരെപ്പോലെ തന്നെ ബ്രസീലിലെ ഏറ്റവും വലിയ ടാലന്റുകളിൽ ഒന്നായി വാഴ്ത്തപ്പെടുന്ന താരമാണ് എസ്റ്റവാവോ മെസ്സിഞ്ഞോ വില്യൻ. ബ്രസീലിയൻ വമ്പൻമാരായ പാൽമിറാസിന്റെ യൂത്ത് ടീമിന് വേണ്ടിയാണ് മെസ്സിഞ്ഞോ ഇപ്പോൾ കളിച്ചുകൊണ്ടിരിക്കുന്നത്.

16 വയസ്സ് മാത്രമുള്ള താരത്തിന് ഈ പേര് വരാൻ തന്നെ കാരണം മെസ്സിയോടുള്ള ഇഷ്ടമാണ്. ഇപ്പോഴിതാ എഫ്സി ബാഴ്സലോണക്ക് വേണ്ടി കളിക്കണമെന്നുള്ള ആഗ്രഹം മെസ്സിഞ്ഞോ പങ്കുവെച്ചിട്ടുണ്ട്. വേണ്ടി കളിക്കാൻ ആയാൽ അതൊരു സ്വപ്നസാക്ഷാത്കാരമായിരിക്കുമെന്നും മെസ്സിഞ്ഞോ കൂട്ടിച്ചേർത്തിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.

“ലോകത്തിലെ ഏറ്റവും മികച്ച ക്ലബ്ബുകളിൽ ഒന്നാണ് ബാഴ്സലോണ.നെയ്മർ,മെസ്സി,സുവാരസ് എന്നിവരുടെ കൂട്ടുകെട്ടിനെ കണ്ടുകൊണ്ടാണ് ഞാൻ വളർന്നത്. അതാണ് എന്റെ സ്വപ്നം.ബാഴ്സലോണയുടെ ഒട്ടുമിക്ക മത്സരങ്ങളും ഞാൻ കണ്ടിട്ടുണ്ട്. ആ ക്ലബ്ബിന്റെ ആരാധകനാണ് ഞാൻ. ബാഴ്സലോണയിൽ കളിച്ചിട്ടുള്ള എല്ലാ താരങ്ങളെയും എനിക്കിഷ്ടമാണ്. അവിടെ കളിക്കാൻ കഴിയുമെന്ന് ഞാൻ പ്രതീക്ഷിക്കുന്നു. അങ്ങനെ സാധിച്ചാൽ അതെന്നെ സംബന്ധിച്ചിടത്തോളം സ്വപ്നസാക്ഷാത്കാരമായിരിക്കും ” ഇതാണ് മെസ്സിഞ്ഞോ പറഞ്ഞിട്ടുള്ളത്.

എന്നാൽ ക്ലബ്ബിലും രാജ്യത്തിലും യൂത്ത് ടീമുകളിൽ മാത്രമാണ് അദ്ദേഹം കളിച്ചിട്ടുള്ളത്. 16 കാരനായ ഈ താരം സീനിയർ തലത്തിലും മികവ് പ്രകടിപ്പിക്കുമെന്നാണ് പ്രതീക്ഷിക്കപ്പെടുന്നത്. ബാഴ്സ ഉൾപ്പെടെയുള്ള വമ്പന്മാർ താരത്തിൽ താൽപര്യം പ്രകടിപ്പിച്ചതായി മുണ്ടോ ഡിപ്പോർട്ടിവോ റിപ്പോർട്ട് ചെയ്തിരുന്നു.മാഞ്ചസ്റ്റർ സിറ്റി,പിഎസ്ജി എന്നിവർക്കും ഈ താരത്തിൽ താല്പര്യമുണ്ട്.