പിഎസ്ജിക്കെതിരെ മെസ്സി ഫോമിലേക്കുയരും, ആത്മവിശ്വാസത്തോടെ കൂമാൻ!

യുവേഫ ചാമ്പ്യൻസ് ലീഗ് പ്രീ ക്വാർട്ടർ പോരാട്ടത്തിന്റെ ആദ്യപാദത്തിൽ ക്യാമ്പ് നൗവിൽ വെച്ചാണ് ബാഴ്സയും പിഎസ്ജിയും തമ്മിൽ മാറ്റുരക്കുന്നത്. പിഎസ്ജി നിരയിൽ സൂപ്പർ താരം നെയ്മർ ജൂനിയർ പരിക്ക് മൂലം കളിച്ചേക്കില്ല. മറുഭാഗത്ത് ലയണൽ മെസ്സി തന്നെയാണ് ബാഴ്സയുടെ പ്രതീക്ഷകൾ. കഴിഞ്ഞ മത്സരത്തിൽ എണ്ണം പറഞ്ഞ രണ്ട് ഗോളുകൾ നേടിക്കൊണ്ട് മെസ്സി ഫോമിലേക്കുയർന്നിരുന്നു. അതേ ഫോം മെസ്സി പിഎസ്ജിക്കെതിരെയും ആവർത്തിക്കുമെന്ന ആത്മവിശ്വാസത്തിലാണ് ബാഴ്സ പരിശീലകൻ റൊണാൾഡ് കൂമാനുള്ളത്.ഇന്നലെ ഡയാറിയോ എഎസിന് നൽകിയ അഭിമുഖത്തിലും ഇത്‌ തന്നെയാണ് കൂമാൻ പങ്കുവെച്ചതും.ഈയിടെയായി മെസ്സി മുന്നേറ്റനിരയിൽ മികച്ച ഫോമിലാണ് കളിക്കുന്നതെന്ന് കൂമാൻ തുറന്നു പറഞ്ഞു.

” മെസ്സി വളരെയധികം ശ്രദ്ധാലുവാണ്. മാത്രമല്ല, അദ്ദേഹം ആവേശഭരിതനുമാണ്.അദ്ദേഹം സന്തോഷവാനാണ്. ഈയിടെയായി മുന്നേറ്റനിരയിൽ അദ്ദേഹം വളരെയധികം കാര്യക്ഷമമായും മികവോടെയും കളിക്കുന്നുണ്ട്.വളരെ പെട്ടന്ന് കണ്ടെത്താൻ കഴിയുന്ന ഒരു താരമാണ് മെസ്സി.ടീമിലെ മറ്റുള്ള താരങ്ങൾക്ക് ഒരുപാട് ഡെപ്ത്ത് നൽകാൻ അദ്ദേഹത്തിന് കഴിയുന്നുണ്ട്.മത്സരത്തിൽ വളരെ വലിയ തോതിൽ വിഷനുള്ള ഒരു താരമാണ് മെസ്സി ” കൂമാൻ അഭിമുഖത്തിൽ പറഞ്ഞു. ഇന്ത്യൻ സമയം ചൊവ്വാഴ്ച രാത്രി 1:30-നാണ് പിഎസ്ജി-ബാഴ്‌സ മത്സരം നടക്കുക.