നെയ്മർ തിരികെ ബാഴ്സയിലേക്കെത്താൻ സാധ്യതകളുണ്ടോ?

പിഎസ്ജിയുടെ ബ്രസീലിയൻ സൂപ്പർതാരമായ നെയ്മർ ജൂനിയർ ഈ സീസണിന് ശേഷം ക്ലബ്ബ് വിടാനുള്ള ഒരുക്കത്തിലാണ്. താരത്തെ ഒഴിവാക്കാൻ കഴിഞ്ഞ ട്രാൻസ്ഫർ വിൻഡോയിൽ തന്നെ പിഎസ്ജി ശ്രമിച്ചിരുന്നു.പക്ഷേ ക്ലബ്ബ് വിടാൻ നെയ്മർക്ക് താല്പര്യമില്ലാത്തതിനാൽ അന്ന് അത് നടന്നിരുന്നില്ല.എന്നാൽ ഇപ്പോൾ സ്ഥിതിഗതികൾ മാറിമറിഞ്ഞതായാണ് റിപ്പോർട്ടുകൾ.

ആരാധകരുടെ പ്രവർത്തികളിൽ നെയ്മർ ജൂനിയർ കടുത്ത അസംതൃപ്തനാണ്. അതുകൊണ്ടുതന്നെ ഈ സീസണിന് ശേഷം ക്ലബ്ബ് വിടുന്ന കാര്യം നെയ്മർ ജൂനിയറും ഗൗരവമായി പരിഗണിക്കുന്നുണ്ട്.നിലവിൽ ചില ഇംഗ്ലീഷ് പ്രീമിയർ ലീഗ് ക്ലബ്ബുകൾക്ക് നെയ്മറിൽ താല്പര്യമുണ്ട്.ചെൽസി,ന്യൂകാസിൽ യുണൈറ്റഡ് എന്നിവരെയൊക്കെ നെയ്മറുമായി ബന്ധപ്പെടുത്തിക്കൊണ്ട് ഇപ്പോൾ വാർത്തകൾ സജീവമാണ്.നെയ്മറുടെ ഉയർന്ന സാലറി താങ്ങാൻ കപ്പാസിറ്റിയുള്ള ടീമുകൾ കൂടിയാണ് ഇത്.

2017ൽ ലോക റെക്കോർഡ് തുകക്കായിരുന്നു നെയ്മർ ജൂനിയർ ബാഴ്സ വിട്ടുകൊണ്ട് പിഎസ്ജിയിൽ എത്തിയത്. പിന്നീട് പലപ്പോഴും നെയ്മർ ബാഴ്സയിലേക്ക് തന്നെ തിരികെയെത്തിയേക്കും എന്ന വാർത്തകൾ ഉണ്ടായിരുന്നു.പക്ഷേ അതൊക്കെ വിഫലമാവുകയായിരുന്നു.നെയ്മർ പിഎസ്ജി വിടാൻ ആലോചിക്കുന്ന ഈ സന്ദർഭത്തിൽ അദ്ദേഹം ബാഴ്സയിലേക്ക് തിരികെ എത്താൻ സാധ്യതയുണ്ട് എന്നുള്ളത് ആരാധകർ ഉറ്റു നോക്കുന്ന ഒരു കാര്യമാണ്.

ഇതുമായി ബന്ധപ്പെട്ട ഒരു റിപ്പോർട്ട് പ്രമുഖ മാധ്യമപ്രവർത്തകനായ ആൽഫ്രഡോ മാർട്ടിനസ് പുറത്തു വിട്ടിട്ടുണ്ട്. അതായത് നെയ്മർ ബാഴ്സയിലേക്ക് തിരികെയെത്താൻ നിലവിൽ ഒരു സാധ്യതയുമില്ല. നിലവിലെ അവസ്ഥയിൽ അദ്ദേഹത്തെ ബാഴ്സ തിരികെ കൊണ്ടുവരുന്ന കാര്യത്തിൽ പരിഗണിച്ചിട്ട് പോലുമില്ല. മാത്രമല്ല സാമ്പത്തികമായി ഇത് സാധ്യവുമല്ല. അതുകൊണ്ടുതന്നെ ഇനി ബാഴ്സയിലേക്ക് തിരികെ എത്താൻ സാധ്യതയില്ല എന്ന് തന്നെ ഉറപ്പിക്കാം