നെയ്മറെ ബാഴ്സക്കും മറ്റ് ക്ലബുകൾക്കും ഓഫർ ചെയ്ത് പിഎസ്ജി,പക്ഷേ!

കഴിഞ്ഞ യുവേഫ ചാമ്പ്യൻസ് ലീഗ് മത്സരത്തിൽ റയലിനോട് പരാജയപ്പെട്ടു കൊണ്ട് പുറത്തായതോടെ കൂടി വലിയ രൂപത്തിലുള്ള വിമർശനങ്ങളാണ് പിഎസ്ജിക്ക് ഏൽക്കേണ്ടി വന്നത്. സൂപ്പർ താരം നെയ്മർ ജൂനിയർ ഒഴിവാക്കണമെന്നുള്ള ആവശ്യം ചിലർക്കിടയിൽ ഉയർന്നു കേട്ടിരുന്നു. അത് മാത്രമല്ല കഴിഞ്ഞ ലീഗ് വൺ മത്സരത്തിൽ പിഎസ്ജി ആരാധകർ തന്നെ നെയ്മറെ കൂവി വിളിക്കുകയും ചെയ്തിരുന്നു.

ഇതിന് പിന്നാലെ നെയ്മറെ പിഎസ്ജി ഒഴിവാക്കുമെന്നുള്ള അഭ്യൂഹങ്ങൾ സജീവമായിരുന്നു.താരത്തിന് മികച്ച പ്രകടനം നടത്താൻ കഴിയാത്തത് തന്നെയാണ് ഇതിന് കാരണമായി കൊണ്ട് ചൂണ്ടിക്കാണിക്കുന്നത്. ഇപ്പോഴിതാ പ്രമുഖ ഫ്രഞ്ച് മാധ്യമമായ ഫൂട്ട് മെർക്കാറ്റോയുടെ ജേണലിസ്റ്റായ സാന്റി ഔന ഒരു റിപ്പോർട്ട് പുറത്തേക്ക് വിട്ടിട്ടുണ്ട്.അതായത് പിഎസ്ജി നെയ്മറെ എഫ് സി ബാഴ്സലോണക്കും മറ്റു ക്ലബ്ബുകൾക്കും ഓഫർ ചെയ്തു എന്നാണ് ഇദ്ദേഹം കണ്ടെത്തിയിരിക്കുന്നത്. നെയ്മറെ ഒഴിവാക്കാൻ തന്നെയാണ് പിഎസ്ജിയുടെ തീരുമാനം എന്നാണ് ഇദ്ദേഹം പറഞ്ഞു വെക്കുന്നത്.

പക്ഷേ നെയ്മറെ തിരികെയെത്തിക്കാൻ ബാഴ്സക്ക് പ്ലാനില്ല എന്നുള്ള കാര്യം കൂടി ഇദ്ദേഹം കൂട്ടിച്ചേർക്കുന്നുണ്ട്. വലിയ രൂപത്തിലുള്ള സാലറി നെയ്മർക്ക് ആവശ്യമാണ്. അത് മാത്രമല്ല ഒരു സാമ്പത്തിക പ്രതിസന്ധിയിലൂടെയാണ് ബാഴ്സ ഇപ്പോൾ കടന്നുപോകുന്നത്.അത്കൊണ്ട് തന്നെ നെയ്മർ ബാഴ്സയിലേക്കെത്തില്ല. മറ്റേതെങ്കിലും ക്ലബ്ബ് താരത്തിന് വേണ്ടി പിഎസ്ജിയെ സമീപിക്കുമോ എന്നുള്ളത് കാത്തിരുന്ന് കാണേണ്ട കാര്യമാണ്.

30- കാരനായ നെയ്മർക്ക് ഇനിയും ക്ലബ്ബുമായി മൂന്നുവർഷത്തെ കരാർ അവശേഷിക്കുന്നുണ്ട്. ഈ സീസണിൽ നെയ്മർക്ക് വേണ്ടത്ര മികച്ച പ്രകടനം നടത്താൻ കഴിഞ്ഞിട്ടില്ല. ഈ യുവേഫ ചാമ്പ്യൻസ് ലീഗിൽ ഒരു ഗോൾ പോലും നേടാനാവാതെയാണ് നെയ്മർ മടങ്ങുന്നത്.