ടിറ്റെയും ആഞ്ചലോട്ടിയും തന്നെ കുറിച്ച് സംസാരിച്ചു,ബ്രസീലും റയലും തമ്മിലുള്ള വിത്യാസം തുറന്ന് പറഞ്ഞ് വിനീഷ്യസ്!

ഈ കഴിഞ്ഞ സീസണിൽ റയൽ മാഡ്രിഡിനു വേണ്ടി മിന്നുന്ന പ്രകടനമായിരുന്നു ബ്രസീലിയൻ സൂപ്പർ താരമായ വിനീഷ്യസ് ജൂനിയർ പുറത്തെടുത്തത്.22 ഗോളുകളും 20 അസിസ്റ്റുകളുമായി ആകെ 42 ഗോൾ പങ്കാളിത്തങ്ങൾ വഹിക്കാൻ വിനീഷ്യസിന് സാധിച്ചിരുന്നു.റയലിനൊപ്പം ലാലിഗയും ചാമ്പ്യൻസ് ലീഗ് കിരീടവും അദ്ദേഹം കരസ്ഥമാക്കിയിരുന്നു.

ഏതായാലും കഴിഞ്ഞ ദിവസം സ്പോർട് ടിവിക്ക് നൽകിയ അഭിമുഖത്തിൽ നിരവധി കാര്യങ്ങളെ കുറിച്ച് വിനീഷ്യസ് സംസാരിച്ചിരുന്നു.തന്നെ കുറിച്ച് ടിറ്റെയും ആഞ്ചലോട്ടിയും പരസ്പരം സംസാരിച്ച് ഒരു എഗ്രിമെന്റിൽ എത്തിയിട്ടുണ്ട് എന്നാണ് വിനീഷ്യസ് പറഞ്ഞിട്ടുള്ളത്. കൂടാതെ റയൽ മാഡ്രിഡും ബ്രസീലും തമ്മിലുള്ള വ്യത്യാസം വിനീഷ്യസ് വിശദീകരിക്കുകയും ചെയ്തിട്ടുണ്ട്.താരത്തിന്റെ വാക്കുകൾ ഇങ്ങനെയാണ്.

” റയൽ മാഡ്രിഡിൽ എനിക്ക് മികച്ച പ്രകടനം നടത്താൻ സാധിച്ചു. അപ്പോൾ ടിറ്റെ കാർലോ ആഞ്ചലോട്ടിയോട് ചില കാര്യങ്ങൾ ചോദിച്ചറിഞ്ഞിരുന്നു. എങ്ങനെയാണ് എനിക്ക് ബ്രസീലിൽ ദേശീയ ടീമിനെ കൂടുതൽ സഹായിക്കാൻ കഴിയുക എന്നുള്ളതായിരുന്നു ടിറ്റെ ആഞ്ചലോട്ടിയോട് ചോദിച്ചത്. അവർ പരസ്പരം മനസ്സിലാക്കാറുണ്ട്. അവർ പരസ്പരം സംസാരിക്കുകയും ഒരു എഗ്രിമെന്റിൽ എത്തുകയും ചെയ്തിട്ടുണ്ട്. ബ്രസീൽ ടീമിൽ ടിറ്റെ ഞങ്ങളോട് കൂടുതൽ അറ്റാക്ക് ചെയ്യാൻ ആവശ്യപ്പെടാറുണ്ട്.മാഡ്രിഡിൽ ഞാൻ ഒരൽപം വെയിറ്റ് ചെയ്യാറുണ്ട്. ബ്രസീലിൽ കൂടുതൽ പന്ത് കൈവശം വെച്ച് കൊണ്ടാണ് ഞങ്ങൾ കളിക്കാറുള്ളത്. ഇതാണ് ബ്രസീലും റയലും തമ്മിലുള്ള വ്യത്യാസം ” ഇതാണ് വിനീഷ്യസ് പറഞ്ഞിട്ടുള്ളത്.

വരുന്ന വേൾഡ് കപ്പിൽ ബ്രസീൽ ഏറ്റവും കൂടുതൽ പ്രതീക്ഷകൾ വെച്ചുപുലർത്തുന്ന താരങ്ങളിലൊരാളാണ് വിനീഷ്യസ് ജൂനിയർ. കഴിഞ്ഞ സീസണിലെ പ്രകടനം അടുത്ത സീസണിലും അദ്ദേഹത്തിൽ നിന്ന് റയൽ മാഡ്രിഡ് ആരാധകർ പ്രതീക്ഷിക്കുന്നുണ്ട്.