ഞങ്ങൾ പതിയെ ബെസ്റ്റിലേക്ക് എത്തുന്നുണ്ട്: എതിരാളികൾക്ക് മുന്നറിയിപ്പുമായി ആഞ്ചലോട്ടി!

ഇന്നലെ ലാലിഗയിൽ നടന്ന മത്സരത്തിൽ വിജയം കൊയ്യാൻ റയൽ മാഡ്രിഡിന് കഴിഞ്ഞിരുന്നു. ഒന്നിനെതിരെ നാല് ഗോളുകൾക്കാണ് റയൽ എസ്പനോളിനെ പരാജയപ്പെടുത്തിയിട്ടുള്ളത്.മത്സരത്തിൽ ആദ്യം റയൽ മാഡ്രിഡ് ഒരു ഗോൾ വഴങ്ങുകയാണ് ചെയ്തിട്ടുള്ളത്.എന്നാൽ പിന്നീട് അവർ നാലെണ്ണം തിരിച്ചടിക്കുകയായിരുന്നു.വിനീഷ്യസ് ജൂനിയറുടെ ഒരു മികവാണ് ഈ വിജയം നേടാൻ റയലിനെ സഹായിച്ചിട്ടുള്ളത്. പകരക്കാരനായി ഇറങ്ങിയ താരം ഒരു ഗോളും ഒരു അസിസ്റ്റും നേടുകയായിരുന്നു.

എംബപ്പേ,റോഡ്രിഗോ,കാർവ്വഹൽ എന്നിവർ ഓരോ ഗോളുകൾ വീതം നേടിയിട്ടുണ്ട്. നിരവധി സൂപ്പർതാരങ്ങൾ ഉണ്ടായിട്ടും പ്രതീക്ഷിച്ച രൂപത്തിൽ ക്ലിക്കാവാത്തത് കൊണ്ട് തന്നെ റയലിന് വിമർശനങ്ങൾ ഏൽക്കേണ്ടി വന്നിരുന്നു. എന്നാൽ ഇതിനെല്ലാം മറുപടി പരിശീലകനായ കാർലോ ആഞ്ചലോട്ടി നൽകി കഴിഞ്ഞിട്ടുണ്ട്.ഞങ്ങൾ പതിയെ ഞങ്ങളുടെ ബെസ്റ്റ് ലെവലിലേക്ക് എത്തിത്തുടങ്ങുന്നുണ്ട് എന്നാണ് പരിശീലകൻ പറഞ്ഞിട്ടുള്ളത്.അദ്ദേഹത്തിന്റെ വാക്കുകൾ ഇങ്ങനെയാണ്.

“എന്നെ സംബന്ധിച്ചിടത്തോളം ഇതൊരു മികച്ച മത്സരമായിരുന്നു. ഗോൾ വഴങ്ങിയതിനുശേഷം വളരെ മികച്ച രീതിയിൽ തന്നെ ഞങ്ങൾ റിയാക്ട് ചെയ്തു.മികച്ച രീതിയിൽ ഞങ്ങളാണ് കളിച്ചത്,കൂടുതൽ റിഥം ഉണ്ടായിരുന്നു,കൂടുതൽ ചാൻസുകൾ ഒരുക്കാൻ ഞങ്ങൾക്ക് സാധിച്ചു.വളരെ വേഗതയോടു കൂടിയാണ് ഞങ്ങൾ മത്സരത്തിൽ കളിച്ചിട്ടുള്ളത്.മൂന്നാമത്തെ ഗോൾ കിടിലൻ ആയിരുന്നു. ഒരു കിടിലൻ കൗണ്ടർ അറ്റാക്കിലൂടെയാണ് ആ ഗോൾ നേടിയത്. ഞങ്ങൾ പതിയെ ഞങ്ങളുടെ ബെസ്റ്റ് ലെവലിലേക്ക് എത്തുകയാണ് ” ഇതാണ് റയൽ മാഡ്രിഡ് പരിശീലകൻ പറഞ്ഞിട്ടുള്ളത്.

നിലവിൽ ലാലിഗയിൽ രണ്ടാം സ്ഥാനത്താണ് റയൽ മാഡ്രിഡ് ഉള്ളത്.ആറു മത്സരങ്ങളിൽ നിന്ന് നാലു വിജയങ്ങൾ നേടിയ അവരുടെ പോയിന്റ് സമ്പാദ്യം 14 ആണ്.ലാലിഗയിൽ അവസാനമായി കളിച്ച 38 മത്സരങ്ങളിൽ ഒന്നിൽ പോലും റയൽ മാഡ്രിഡ് പരാജയപ്പെട്ടിട്ടില്ല.ലാലിഗ ചരിത്രത്തിലെ ഏറ്റവും വലിയ രണ്ടാമത്തെ അപരാജിത കുതിപ്പാണ് ഇത്.