ഞങ്ങൾ പഞ്ചറാകുന്നതിന് വേണ്ടി അവർ കാത്തിരുന്നു, നടന്നില്ല :ആഞ്ചലോട്ടി

ഈ സീസണിൽ ഏവരെയും അത്ഭുതപ്പെടുത്തുന്ന പ്രകടനമാണ് റയൽ മാഡ്രിഡ് നടത്തിക്കൊണ്ടിരിക്കുന്നത്. ലാലിഗ കിരീടവും സ്പാനിഷ് സൂപ്പർ കപ്പും അവർ സ്വന്തമാക്കിയിട്ടുണ്ട്. ചാമ്പ്യൻസ് ലീഗ് ഫൈനലിൽ ബൊറൂസിയ ഡോർട്മുണ്ടാണ് റയലിന്റെ എതിരാളികൾ. നിരവധി പ്രതിസന്ധികൾ ഉണ്ടായിട്ടും അതെല്ലാം മറികടന്നു കൊണ്ടാണ് റയൽ മാഡ്രിഡ് ഈ നേട്ടങ്ങൾ കരസ്ഥമാക്കിയിട്ടുള്ളത്.

ഈ സീസണിൽ എല്ലാ കോമ്പറ്റീഷനിലുമായി ആകെ 51 മത്സരങ്ങളിലാണ് റയൽ മാഡ്രിഡ് കളിച്ചിട്ടുള്ളത്. അതിൽ 41 മത്സരങ്ങളിൽ വിജയിക്കുകയും 8 സമനിലകൾ വഴങ്ങുകയും ചെയ്തു.കേവലം രണ്ട് മത്സരത്തിൽ മാത്രമാണ് റയൽ മാഡ്രിഡ് പരാജയപ്പെട്ടിട്ടുള്ളത്. ആകെ 120 ഗോളുകൾ നേടിയപ്പോൾ 45 ഗോളുകൾ മാത്രമാണ് വഴങ്ങിയിട്ടുള്ളത്. 23 ക്ലീൻ ഷീറ്റുകൾ നേടിയതിൽ 20 ക്ലീൻ ഷീറ്റുകളും ലാലിഗയിലായിരുന്നു. ക്ലബ്ബിന്റെ ചരിത്രത്തിൽ ആദ്യമായാണ് ഇത്രയധികം ക്ലീൻ ഷീറ്റുകൾ ഒരു ലീഗ് സീസണിൽ സ്വന്തമാക്കുന്നത്.37 ഇഞ്ചുറികളാണ് ആകെ ക്ലബ്ബിൽ ഈ സീസണിൽ രേഖപ്പെടുത്തപ്പെട്ടിട്ടുള്ളത്. ഇതിനെയെല്ലാം തരണം ചെയ്തു കൊണ്ടാണ് റയൽ ഈ നേട്ടങ്ങൾ സ്വന്തമാക്കിയിട്ടുള്ളത്.

അതുകൊണ്ടുതന്നെ കാർലോ ആഞ്ചലോട്ടി തന്റെ കരിയറിലെ ഏറ്റവും മികച്ച സീസണായി കൊണ്ടാണ് ഇതിനെ പരിഗണിക്കുന്നത്. റയൽ മാഡ്രിഡ് പഞ്ചറാകുന്നതിനുവേണ്ടി പലരും കാത്തിരുന്നുവെന്നും എന്നാൽ അത് നടന്നില്ല എന്നും ആഞ്ചലോട്ടി പറഞ്ഞിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.

“ഒരു സംശയവും വേണ്ട,ഇതാണ് എന്റെ ഏറ്റവും ബെസ്റ്റ് ലീഗ്. ഞങ്ങൾ മെറിറ്റോടുകൂടിയാണ് ഈ ലീഗ് കിരീടം സ്വന്തമാക്കിയിട്ടുള്ളത്.പലരും ഞങ്ങൾ പഞ്ചറാകുന്നതിന് വേണ്ടി കാത്തിരുന്നു.എന്നാൽ ഒരുതവണ പോലും അത് സംഭവിച്ചില്ല. ഇനിയും ഞങ്ങൾക്ക് ഇതുപോലെ തുടരേണ്ടതുണ്ട് “ഇതാണ് റയൽ മാഡ്രിഡ് പരിശീലകൻ പറഞ്ഞിട്ടുള്ളത്.

ഇനി ലാലിഗയിൽ രണ്ടു മത്സരങ്ങളാണ് റയൽ മാഡ്രിഡിന് അവശേഷിക്കുന്നത്.വിയ്യാറയൽ,റയൽ ബെറ്റിസ് എന്നിവരാണ് എതിരാളികൾ. ഈ രണ്ടു മത്സരങ്ങളിലും വിജയിച്ചു കഴിഞ്ഞാൽ 99 പോയിന്റ് പൂർത്തിയാക്കാൻ റയൽ മാഡ്രിഡിന് കഴിയും.അതിനുശേഷമാണ് ചാമ്പ്യൻസ് ലീഗ് ഫൈനൽ അവർ കളിക്കുക.