ജനുവരിയിൽ ബാഴ്‌സ വിടാൻ ശ്രമം നടത്തുമോ? തന്റെ പദ്ധതികൾ വെളിപ്പെടുത്തി മെസ്സി !

സ്പാനിഷ് മാധ്യമമായ ലാ സെക്സ്റ്റക്ക്‌ പുതുതായി നൽകിയ അഭിമുഖത്തിൽ നിരവധി കാര്യങ്ങളെ കുറിച്ച് സൂപ്പർ താരം ലയണൽ മെസ്സി സംസാരിച്ചിരുന്നു. ഇന്നലെയായിരുന്നു ആ അഭിമുഖം സ്പാനിഷ് മാധ്യമം പുറത്ത് വിട്ടത്. കഴിഞ്ഞ ഓഗസ്റ്റിൽ ഗോൾ ഡോട്ട് കോമിന് ഇന്റർവ്യൂ നൽകിയതിന് ശേഷം ഇതാദ്യമായാണ് മെസ്സി ഇത്രയും നീളമേറിയ ഒരു അഭിമുഖം നൽകുന്നത്. എഴുപത് മിനുട്ടോളമാണ് മെസ്സി സംസാരിച്ചത്. അതിൽ പ്രധാനമായും ആരാധകർ ഉറ്റുനോക്കിയിരുന്നത് താരം തന്റെ ഭാവിയെ കുറിച്ച് എന്ത് പറയുമെന്നായിരുന്നു. തന്റെ ഭാവി പദ്ധതികളെ കുറിച്ച് വ്യക്തമാക്കിയിരിക്കുകയാണ് മെസ്സി. ഈ ജനുവരിയിൽ ക്ലബ് വിടാൻ ഉദ്ദേശിക്കുന്നില്ലെന്നും ഈ സീസൺ അവസാനം വരെ താൻ കാത്തിരിക്കുമെന്നും അതിന് ശേഷമാണ് കാര്യങ്ങൾ തീരുമാനിക്കുക എന്നുമാണ് മെസ്സി അറിയിച്ചത്.

” ഈ സീസണിന്റെ അവസാനം വരെ കാത്തിരിക്കാനാണ് ഞാൻ ഇപ്പോൾ തീരുമാനിച്ചിരിക്കുന്നത്. ഇപ്പോഴത്തെ ഏറ്റവും പ്രധാനപ്പെട്ട കാര്യം ടീമിനെ കുറിച്ച് ചിന്തിക്കുക എന്നുള്ളതാണ്. ഈ സീസൺ നല്ല രീതിയിൽ അവസാനിപ്പിക്കണം. കിരീടങ്ങൾ നേടാൻ ശ്രമിക്കണം. ഈ കാര്യങ്ങളെ തകിടം മറിക്കുന്ന ഒന്നും തന്നെ ഇപ്പോൾ ഞാൻ ചെയ്യാൻ ഉദ്ദേശിക്കുന്നില്ല ” മെസ്സി പറഞ്ഞു.
“നിലവിൽ ബാഴ്സയിൽ പുതിയ താരങ്ങളുണ്ട്, യുവതാരങ്ങളുണ്ട്, ഞാൻ മുമ്പ് പറഞ്ഞ പോലെ തന്നെ കിരീടങ്ങൾ നേടാൻ ഞങ്ങൾ പരമാവധി പോരാടും. ചാമ്പ്യൻസ് ലീഗും ലാലിഗയുമാണ് ലക്ഷ്യങ്ങൾ. എല്ലാം നല്ല രീതിയിൽ അവസാനിക്കണമെന്നാണ് ഞാൻ ആഗ്രഹിക്കുന്നത് ” മെസ്സി കൂട്ടിച്ചേർത്തു.