ആ പിഎസ്ജി സൂപ്പർ താരത്തോടൊപ്പം കളിക്കുന്നത് എല്ലാവരുടെയും ആഗ്രഹം : വിനീഷ്യസ്

ഈ സീസണിൽ മിന്നുന്ന ഫോമിൽ കളിച്ചു കൊണ്ടിരിക്കുന്ന താരമാണ് വിനീഷ്യസ് ജൂനിയർ. റയൽ മാഡ്രിഡിനെ സംബന്ധിച്ചിടത്തോളം വിനീഷ്യസ് ഫോമിലേക്കുയർന്നത് ആശ്വാസകരമായ ഒരു കാര്യമാണ്. എന്തെന്നാൽ സൂപ്പർ താരം കിലിയൻ എംബപ്പേക്ക്‌ വേണ്ടി റയൽ വലിയ തോതിൽ പരിശ്രമങ്ങൾ നടത്തിയിരുന്നുവെങ്കിലും അതൊന്നും ഫലം കണ്ടിരുന്നില്ല. പക്ഷേ വിനീഷ്യസിന്റെ ഫോം ഈയൊരു അവസരത്തിൽ റയലിന് തുണയാവുകയായിരുന്നു.

ഏതായാലും എംബപ്പേയെ പ്രശംസിച്ചു കൊണ്ടിപ്പോൾ വിനീഷ്യസ് രംഗത്ത് വന്നിട്ടുണ്ട്. എല്ലാ താരങ്ങളുടെയും ആഗ്രഹമാണ് എംബപ്പേക്കൊപ്പം കളിക്കുക എന്നുള്ളതാണ് വിനീഷ്യസ് അറിയിച്ചിട്ടുള്ളത്.കഴിഞ്ഞ ദിവസം എസ്പോർട്ടെ ഇന്റെറാറ്റിവോയോട് സംസാരിക്കുകയായിരുന്നു ഈ ബ്രസീലിയൻ താരം.

“എല്ലാ താരങ്ങളും കിലിയൻ എംബപ്പേയോടൊപ്പം കളിക്കാൻ ആഗ്രഹിക്കുന്നു.അദ്ദേഹമൊരു മികച്ച താരമാണ്.ക്രിസ്റ്റ്യാനോ റൊണാൾഡോ, ലയണൽ മെസ്സി എന്നിവരെ പോലെയാണ് എംബപ്പേ.ഒരുപാട് വർഷം ഇവിടെ തുടരേണ്ട വരുന്ന തലമുറയെയാണ് അദ്ദേഹം പ്രതിനിധീകരിക്കുന്നത് ” വിനീഷ്യസ് പറഞ്ഞു. ഏതായാലും അടുത്ത സീസണിൽ എംബപ്പേയും വിനീഷ്യസും ഒന്നിക്കുമോ എന്നാണ് ആരാധകർക്കറിയേണ്ടത്.