ആവേശകരം, ലാലിഗ കിരീടം ചൂടി അത്ലറ്റിക്കോ മാഡ്രിഡ്‌!

ആവേശകരമായ ക്ലൈമാക്സിനൊടുവിൽ ലാലിഗ കിരീടം നെഞ്ചോട് ചേർത്ത് അത്ലറ്റിക്കോ മാഡ്രിഡ്‌.ഇന്നലെ നടന്ന അവസാനമത്സരത്തിൽ റയൽ വല്ലഡോലിഡിനെ 2-1 ന് കീഴടക്കി കൊണ്ടാണ് അത്ലറ്റിക്കോ മാഡ്രിഡ്‌ കിരീടം ചൂടിയത്. രണ്ടാം സ്ഥാനക്കാരായ റയൽ മാഡ്രിഡും ഇതേ സ്കോറിന് വിയ്യാറയലിനെ കീഴടക്കിയെങ്കിലും അത്ലറ്റിക്കോ പോയിന്റുകൾ നഷ്ടപ്പെടുത്താൻ തയ്യാറല്ലായിരുന്നു. ഇതോടെ പതിനൊന്നാം ലാലിഗ കിരീടമാണ് അത്ലറ്റിക്കോ മാഡ്രിഡ്‌ സ്വന്തമാക്കിയത്.

മത്സരത്തിന്റെ 18-ആം മിനുട്ടിൽ തന്നെ ഓസ്കാർ പ്ലാനോ ഗോൾ നേടിയതോടെ അത്ലറ്റിക്കോ പരുങ്ങലിലായി. എന്നാൽ കിരീടദാഹത്തോടെ കളിച്ച അത്ലറ്റിക്കോക്ക് വേണ്ടി 57-ആം മിനുട്ടിൽ കൊറേയ ഗോൾ നേടുകയായിരുന്നു.പിന്നീടാണ് സുവാരസ് എന്ന രക്ഷകൻ അവതരിക്കുന്നത്.67-ആം മിനുട്ടിൽ ലഭിച്ച പന്തുമായി കുതിച്ച സുവാരസ് അത്ലറ്റിക്കോയുടെ വിജയഗോൾ നേടുകയായിരുന്നു. ഈ സീസണിൽ അത്ലറ്റിക്കോ ചാമ്പ്യൻമാരാക്കുന്നതിൽ വലിയൊരു പങ്കും അത്ലറ്റിക്കോയുടേതാണ്.

ഇതിനോട് സമാനമായ ഒരു വിജയം തന്നെയാണ് റയൽ മാഡ്രിഡ്‌ നേടിയത്.ഒരു ഗോളിന് പിറകിൽ നിന്ന ശേഷം അവസാനനിമിഷം രണ്ട് ഗോളുകൾ തിരിച്ചടിച്ച് റയൽ വിജയം കൊയ്യുകയായിരുന്നു. പക്ഷേ അത്ലറ്റിക്കോയുടെ വിജയം റയലിനെ രണ്ട് പോയിന്റുകൾക്ക് പിന്നിലാക്കി.മത്സരത്തിന്റെ 20-ആം മിനുട്ടിൽ പിനോയായിരുന്നു വിയ്യാറയലിന്റെ ഗോൾ നേടിയത്.ഇതിന് മറുപടി ഗോൾ 87-ആം മിനുട്ടിലാണ് പിറക്കുന്നത്. റോഡ്രിഗോയുടെ അസിസ്റ്റിൽ നിന്ന് ബെൻസിമയാണ് ഗോൾ നേടിയത്.92-ആം മിനുട്ടിൽ ബെൻസിമയുടെ അസിസ്റ്റിൽ മോഡ്രിച്ച് വിജയഗോൾ നേടുകയായിരുന്നു.