അവൻ ഭയപ്പെടുത്തുന്നു :യമാലിനെക്കുറിച്ച് റൂഡിഗർ പറഞ്ഞത് കേട്ടോ..?

കേവലം 17 വയസ്സ് മാത്രമുള്ള ലാമിൻ യമാൽ ഗംഭീര പ്രകടനമാണ് ഈ സീസണിൽ നടത്തിക്കൊണ്ടിരിക്കുന്നത്.ബാഴ്സലോണക്ക് വേണ്ടി 5 ഗോളുകളും 5 അസിസ്റ്റുകളും ഇതിനോടകം തന്നെ അദ്ദേഹം സ്വന്തമാക്കി കഴിഞ്ഞു. കഴിഞ്ഞ മാസത്തെ ഏറ്റവും മികച്ച ലാലിഗ താരത്തിനുള്ള പുരസ്കാരം സ്വന്തമാക്കിയത് യമാൽ തന്നെയാണ്.ഏവരെയും അമ്പരപ്പിക്കുന്ന പ്രകടനമാണ് ഈ പ്രായത്തിൽ തന്നെ അദ്ദേഹം നടത്തുന്നത്.

യമാലിനെ പ്രശംസിച്ചുകൊണ്ട് റയൽ മാഡ്രിഡിന്റെ ജർമൻ പ്രതിരോധനിരതാരമായ അന്തോണിയോ റൂഡിഗർ രംഗത്ത് വന്നിട്ടുണ്ട്.അവൻ ചെയ്യുന്ന കാര്യങ്ങൾ ഭയപ്പെടുത്തുന്നു എന്നാണ് റൂഡിഗർ പറഞ്ഞിട്ടുള്ളത്. വലിയൊരു ഭാവി താരത്തിന് ഉണ്ടെന്നും റൂഡിഗർ പറഞ്ഞിട്ടുണ്ട്.അദ്ദേഹത്തിന്റെ വാക്കുകൾ ഇങ്ങനെയാണ്.

” തീർച്ചയായും അവൻ ചെയ്യുന്ന കാര്യങ്ങൾക്ക് അവന് തന്നെ ക്രെഡിറ്റ് നൽകേണ്ടതുണ്ട്.ഒരു വലിയ ഭാവി അവനുണ്ട്.സമീപകാലത്ത് അവൻ നടത്തുന്ന പ്രകടനം,യൂറോ കപ്പിലെ അവന്റെ പ്രകടനം എന്നിവയൊക്കെ തീർത്തും ഭയപ്പെടുത്തുന്നതാണ്. ആരോഗ്യത്തോടുകൂടി അവൻ ഇരിക്കട്ടെ എന്ന് ഞാൻ ആഗ്രഹിക്കുന്നു “ഇതാണ് റയൽ ഡിഫൻഡർ പറഞ്ഞിട്ടുള്ളത്.

നിലവിൽ ബാഴ്സലോണയുടെയും സ്പെയിനിന്റെയും പ്രധാനപ്പെട്ട താരമാണ് യമാൽ. നിരവധി മത്സരങ്ങൾ ഇപ്പോൾ തന്നെ താരത്തിന് കളിക്കേണ്ടി വരുന്നുണ്ട്. ആവശ്യമായ വിശ്രമങ്ങൾ താരത്തിന് നൽകണമെന്ന് ആവശ്യങ്ങൾ ആരാധകർ തന്നെ ഉയർത്തുന്നുണ്ട്.