അപൂർവറെക്കോർഡ് സ്വന്തമാക്കിയതിന് പിന്നാലെ ഫുട്ബോൾ ലോകത്തിന് മെസ്സിയുടെ സ്നേഹസന്ദേശം !

ഇന്നലെ നടന്ന റയൽ വല്ലഡോലിഡിനെതിരെയുള്ള മത്സരത്തിൽ ഗോൾ നേടിയതോടെ ലയണൽ മെസ്സി ചരിത്രത്തിലേക്ക് നടന്നു കയറുകയായിരുന്നു. ഒരു ക്ലബ്ബിന് വേണ്ടി ഏറ്റവും കൂടുതൽ ഗോളുകൾ നേടിയ താരമെന്ന അപൂർവറെക്കോർഡ് ആണ് മെസ്സി സ്വന്തം പേരിലാക്കിയത്. 644 ഗോളുകളാണ് മെസ്സി ബാഴ്സക്ക്‌ വേണ്ടി നേടിയത്. 643 ഗോളുകൾ സാന്റോസിന് വേണ്ടി നേടിയ പെലെയുടെ റെക്കോർഡ് ആണ് മെസ്സി മറികടന്നത്. ഇനി മെസ്സിയുടെ റെക്കോർഡ് ആർക്കെങ്കിലും മറികടക്കണമെങ്കിൽ പതിനഞ്ച് വർഷത്തോളം 43 ഗോൾ ആവറേജിൽ ഒരു ക്ലബ്ബിന് വേണ്ടി നേടണം. ഏതായാലും ഈ അപൂർവറെക്കോർഡ് സ്വന്തമാക്കിയതിന് പിന്നാലെ സ്നേഹസന്ദേശമയച്ചിരിക്കുകയാണ് ലയണൽ മെസ്സി. ബാഴ്‌സയാണ് മെസ്സിയുടെ വാക്കുകളെ പുറത്ത് വിട്ടിരിക്കുന്നത്. എല്ലാവർക്കും മെസ്സി നന്ദി പറയുകയാണ് ചെയ്തത്.

” ഞാൻ ഫുട്ബോൾ കളിച്ചു തുടങ്ങുന്ന കാലത്ത്, ഏതെങ്കിലും ഒരു റെക്കോർഡ് എങ്കിലും തകർക്കാൻ കഴിയുമെന്ന് ഞാൻ കരുതിയിരുന്നില്ല. പ്രത്യേകിച്ച് ഇന്ന് ഞാൻ തകർത്ത പെലെയുടെ റെക്കോർഡ്. ഈ വർഷങ്ങളിലത്രയും എന്നെ സഹായിച്ച എല്ലാവരോടും നന്ദി പറയാനാണ് ഞാനിപ്പോൾ ആഗ്രഹിക്കുന്നത്. എന്റെ സഹതാരങ്ങൾ, എന്റെ കുടുംബം, എന്റെ സുഹൃത്തുക്കൾ, കൂടാതെ ഓരോ ദിവസവും എന്നെ അകമഴിഞ്ഞു പിന്തുണക്കുന്ന ഓരോരുത്തരോടും ഞാൻ നന്ദി അറിയിക്കുന്നു ” മെസ്സി കുറിച്ചു. മുമ്പ് പെലെയുടെ റെക്കോർഡിനൊപ്പമെത്തിയ സമയത്ത് പെലെയും മെസ്സിക്ക് സന്ദേശമയച്ചിരുന്നു.എഫ്സി ബാഴ്സലോണ അതിന് മറുപടി നൽകുകയും ചെയ്തിരുന്നു.