വായുവിനെ അന്വേഷിക്കുകയാണ് : ബുദ്ധിമുട്ട് വെളിപ്പെടുത്തി എമി മാർട്ടിനസ്.

വേൾഡ് കപ്പ് യോഗ്യത റൗണ്ടിൽ ഇന്ന് നടക്കുന്ന രണ്ടാം മത്സരത്തിൽ ലോക ചാമ്പ്യന്മാരായ അർജന്റീനയുടെ എതിരാളികൾ ബൊളീവിയയാണ്. ഇന്ന് രാത്രി ഇന്ത്യൻ സമയം 1:30നാണ് ഈയൊരു മത്സരം അരങ്ങേറുക.ബൊളീവിയയിലെ ലാ പാസിൽ വെച്ചാണ് ഈ മത്സരം നടക്കുക. എതിരാളികൾക്ക് വളരെയധികം ബുദ്ധിമുട്ടുണ്ടാക്കുന്ന ഒരു സ്റ്റേഡിയമാണ് ലാ പാസ്.

സമുദ്രനിരപ്പിൽ നിന്നും 3650 മീറ്റർ ഉയർത്തി സ്ഥിതി ചെയ്യുന്ന ഈ സ്റ്റേഡിയത്തിൽ ശ്വാസമെടുക്കാൻ തന്നെ ബുദ്ധിമുട്ട് അനുഭവപ്പെടാറുണ്ട്. ഇത്തരമൊരു സാഹചര്യത്തിൽ കളിക്കുക എന്നത് വളരെയധികം കഠിനമാണ്. കഴിഞ്ഞ ദിവസം അർജന്റീന ടീം ലാ പാസിൽ വെച്ചു കൊണ്ട് പരിശീലനം നടത്തിയിരുന്നു. അർജന്റീനയുടെ ഗോൾകീപ്പറായ എമിലിയാനോ മാർട്ടിനസ് ലാ പാസിലെ ബുദ്ധിമുട്ടുകൾ വെളിപ്പെടുത്തിയിട്ടുണ്ട്.

സോഷ്യൽ മീഡിയയിൽ ഒരു പോസ്റ്റ് അദ്ദേഹം പങ്കുവെച്ചിട്ടുണ്ട്. ” ട്രെയിനിങ്ങിൽ ഉടനീളം വായുവിനെ അന്വേഷിക്കുകയായിരുന്നു ” എന്നാണ് എമി എഴുതിയിട്ടുള്ളത്. അതായത് ശ്വാസമെടുക്കാൻ ബുദ്ധിമുട്ടുന്നു എന്ന് തന്നെയാണ് അദ്ദേഹം ഉദ്ദേശിച്ചിട്ടുള്ളത്.

ഈ വെല്ലുവിളിയെ മറികടക്കാൻ വേണ്ടി ഓക്സിജൻ ട്യൂബുമായാണ് അർജന്റീന താരങ്ങൾ ബൊളീവിയയിൽ വന്ന് ഇറങ്ങിയിട്ടുള്ളത്. ഓരോ താരങ്ങൾക്കും ചെറിയ ഓക്സിജൻ ട്യൂബുകൾ ലഭ്യമാക്കിയിട്ടുണ്ട്. എന്നാൽ ഈ സാഹചര്യം ഒരു ഒഴിവു കഴിവായി പറയില്ല എന്നത് അർജന്റീനയുടെ പരിശീലകനായ ലയണൽ സ്കലോണി വ്യക്തമാക്കിയിട്ടുണ്ട്. മികച്ച പ്രകടനം നടത്തി മികച്ച വിജയം നേടുക എന്നുള്ളത് മാത്രമാണ് ലക്ഷ്യമെന്നും അർജന്റീന കോച്ച് പ്രഖ്യാപിച്ചിട്ടുണ്ട്.