CR7 റെക്കോർഡുകൾ തേടി പോവാറില്ല,റെക്കോർഡുകൾ അദ്ദേഹത്തെയാണ് തേടുന്നത്: അൽ നസ്ർ

ഇന്നലെ യൂറോ യോഗ്യതയിൽ നടന്ന മത്സരത്തിൽ തകർപ്പൻ വിജയം നേടാൻ പോർച്ചുഗലിന് കഴിഞ്ഞിരുന്നു.എതിരില്ലാത്ത ആറ് ഗോളുകൾക്കാണ് പോർച്ചുഗൽ ലക്‌സംബർഗിനെ പരാജയപ്പെടുത്തിയത്. നായകൻ ക്രിസ്റ്റ്യാനോ റൊണാൾഡോ ഒരിക്കൽ കൂടി തിളങ്ങുകയായിരുന്നു.തുടർച്ചയായ രണ്ടാം മത്സരത്തിലാണ് റൊണാൾഡോ ഇരട്ട ഗോളുകൾ നേടുന്നത്.

അന്താരാഷ്ട്ര ഫുട്ബോളിൽ ഏറ്റവും കൂടുതൽ മത്സരങ്ങൾ കളിച്ച താരവും ഏറ്റവും കൂടുതൽ ഗോളുകൾ നേടിയ താരവും ഫുട്ബോൾ ചരിത്രത്തിൽ ഒഫീഷ്യലായി കൊണ്ട് ഏറ്റവും കൂടുതൽ ഗോളുകൾ നേടിയ താരവുമൊക്കെ ക്രിസ്റ്റ്യാനോ റൊണാൾഡോയാണ്. ഇപ്പോഴിതാ ഇതിനെ പ്രശംസിച്ചുകൊണ്ട് അദ്ദേഹത്തിന്റെ ക്ലബ്ബായ അൽ നസ്ർ ഒരു ട്വീറ്റ്‌ ചെയ്തിട്ടുണ്ട്.റൊണാൾഡോ റെക്കോർഡുകൾ തേടി പോകാറില്ലെന്നും റെക്കോർഡുകൾ അദ്ദേഹത്തെ തേടിയെത്തുന്നു എന്നുമാണ് അവരുടെ ട്വീറ്റ്.

” ഇന്റർനാഷണൽ ഫുട്ബോളിൽ ഏറ്റവും കൂടുതൽ മത്സരങ്ങൾ കളിച്ച താരം,198 മത്സരങ്ങൾ കളിച്ചു.ഫുട്ബോൾ ചരിത്രത്തിൽ ഏറ്റവും കൂടുതൽ ഗോളുകൾ നേടിയ താരം,832 ഗോളുകൾ നേടി. അദ്ദേഹം ഒരിക്കലും റെക്കോർഡുകൾ തേടി പോകാറില്ല, റെക്കോർഡുകൾ അദ്ദേഹത്തെ തേടിയെത്തുന്നു ” ഇതാണ് ക്രിസ്റ്റ്യാനോ റൊണാൾഡോയുടെ ചിത്രം ട്വീറ്റ് ചെയ്തുകൊണ്ട് അൽ നസ്ർ കുറിച്ചിരിക്കുന്നത്.

നിലവിൽ അൽ നസ്റിന് വേണ്ടി കളിച്ചുകൊണ്ടിരിക്കുന്ന റൊണാൾഡോ അവിടെയും മികച്ച പ്രകടനമാണ് നടത്തുന്നത്. ഇനി അടുത്ത മത്സരത്തിൽ അൽ അദാലഹ് ആണ് അൽ നസ്റിന്റെ എതിരാളികൾ.