സർവ്വ മികവും പുറത്തെടുക്കും,എല്ലാ തരം ഗോളുകളും നേടും : ആത്മവിശ്വാസം തുളുമ്പുന്ന വാക്കുകളുമായി നെയ്മർ!

പിഎസ്ജിയുടെ ബ്രസീലിയൻ സൂപ്പർ താരമായ നെയ്മർ ജൂനിയറെ സംബന്ധിച്ചിടത്തോളം കഴിഞ്ഞ സീസൺ മികച്ചതായിരുന്നില്ല.അതുകൊണ്ടുതന്നെ താരത്തിന് നിരവധി വിമർശനങ്ങൾ ഏൽക്കേണ്ടി വന്നിരുന്നു.മാത്രമല്ല,താരത്തെ ഈ സമ്മർ ട്രാൻസ്ഫർ ജാലകത്തിൽ പിഎസ്ജി ഒഴിവാക്കുമെന്നുള്ള അഭ്യൂഹങ്ങളും പരന്നിരുന്നു.

അതുകൊണ്ടുതന്നെ ഇനി വരുന്ന സീസൺ നെയ്മറെ സംബന്ധിച്ചിടത്തോളം വളരെ നിർണായകമാണ്.പിഎസ്ജിയിൽ താരത്തിന് മികച്ച പ്രകടനം പുറത്തെടുത്തോ മതിയാവൂ. മാത്രമല്ല ഈ വർഷം വേൾഡ് കപ്പും അരങ്ങേറുന്നുണ്ട്.അതും നെയ്മർക്ക് പ്രാധാന്യമർഹിക്കുന്ന കാര്യമാണ്.

ഏതായാലും വരുന്ന സീസണിനെ വളരെയധികം ആത്മവിശ്വാസത്തോടുകൂടിയാണ് നെയ്മർ നോക്കി കാണുന്നത്. തന്റെ സർവ്വ മികവും പുറത്തെടുക്കും എല്ലാ തരം ഗോളുകളും നേടുമെന്നുമാണ് നെയ്മർ കഴിഞ്ഞ ദിവസം പറഞ്ഞിട്ടുള്ളത്.ഒരു ലൈവിനിടെ സംസാരിക്കുകയായിരുന്നു താരം. അദ്ദേഹത്തിന്റെ വാക്കുകൾ ഗ്ലോബോ റിപ്പോർട്ട്‌ ചെയ്യുന്നത് ഇങ്ങനെയാണ്.

“ഈ സീസണിൽ എല്ലാം പുറത്തെടുക്കാൻ കഴിയുമെന്ന് ഞാൻ കരുതുന്നു.നമ്മൾ മികച്ച രൂപത്തിലാണെങ്കിൽ അത് നമ്മൾക്ക് തന്നെ അനുഭവപ്പെടും. എനിക്ക് കിരീടങ്ങൾ നേടേണ്ടതുണ്ട്.ലെഫ്റ്റ് കൊണ്ടും റൈറ്റ് കൊണ്ടും എനിക്ക് ഗോളുകൾ നേടണം.ഹെഡറിലൂടെയും ഫ്രീകിക്കിലൂടെയും എനിക്ക് ഗോൾ നേടണം.മാനസികമായി ഞാൻ തയ്യാറാണ്. ഞാൻ വെക്കേഷനിൽ പോലും പരിശീലനം നടത്തുന്നുണ്ട് ” ഇതാണ് നെയ്മർ പറഞ്ഞിട്ടുള്ളത്.

ഏതായാലും അടുത്ത സീസണിൽ നെയ്മർ തന്റെ പൂർണ്ണ മികവിലേക്ക് ഉയരുമെന്നാണ് ആരാധകർ പ്രതീക്ഷിക്കുന്നത്.