സ്വിറ്റ്സർലാന്റും കീഴടങ്ങി,ബ്രസീൽ പ്രീ ക്വാർട്ടറിൽ!

ഖത്തർ വേൾഡ് കപ്പിലെ തങ്ങളുടെ രണ്ടാം മത്സരത്തിലും വിജയം നേടി ബ്രസീൽ. എതിരില്ലാത്ത ഒരു ഗോളിനാണ് ബ്രസീൽ സ്വിറ്റ്സർലാൻഡിനെ പരാജയപ്പെടുത്തിയിട്ടുള്ളത്. സൂപ്പർ താരം കാസമിറോ നേടിയ ഗോളാണ് ബ്രസീലിന് വിജയം സമ്മാനിച്ചിട്ടുള്ളത്. ഇതോടെ ബ്രസീൽ വേൾഡ് കപ്പിന്റെ പ്രീ ക്വാർട്ടറിൽ പ്രവേശിച്ചു കഴിഞ്ഞു.

നെയ്മർ ജൂനിയർക്ക് പകരം ഫ്രഡും ഡാനിലോക്ക് പകരം മിലിറ്റാവോയുമാണ് ആദ്യ ഇലവനിൽ ഉണ്ടായിരുന്നത്.ആദ്യപകുതിയിൽ അവസരങ്ങൾ ഉണ്ടായിരുന്നുവെങ്കിലും ഗോളുകൾ ഒന്നും നേടാൻ ബ്രസീലിന് കഴിഞ്ഞിരുന്നില്ല. എന്നാൽ രണ്ടാം പകുതിയിലാണ് ബ്രസീൽ കൂടുതൽ അറ്റാക്ക് കാഴ്ചവച്ചത്.റോഡ്രിഗോ,ബ്രൂണോ എന്നിവർ വന്നതോടുകൂടി ബ്രസീൽ മികവിലേക്ക് ഉയരുകയായിരുന്നു.

വിനീഷ്യസ് ജൂനിയർ ഒരു തവണ വലയിലേക്ക് പന്ത് എത്തിച്ചുവെങ്കിലും ഓഫ്സൈഡ് വിധിക്കപ്പെടുകയായിരുന്നു. പിന്നീടാണ് കാസമിറോയുടെ ഗോൾ വന്നത്.റോഡ്രിഗോ മറിച്ച് നൽകിയ പാസ് കാസമിറോ ഒരു തകർപ്പൻ ഷോട്ടിലൂടെ വലയിൽ എത്തിക്കുകയായിരുന്നു.

ഈ ഗോളാണ് ബ്രസീലിന് വിജയം സമ്മാനിച്ചിട്ടുള്ളത്. രണ്ട് മത്സരങ്ങളിലും വിജയിച്ച ബ്രസീലിന്റെ സമ്പാദ്യം 6 പോയിന്റ് ആണ്. ഇനി അടുത്ത മത്സരത്തിൽ ബ്രസീലിന്റെ എതിരാളികൾ കാമറൂൺ ആണ്.