സുഡാമേരിക്കാനോ : അർജന്റീനയെ വീഴ്ത്തി ബ്രസീൽ മുന്നോട്ട്.

ഇന്നലെ നടന്ന അണ്ടർ 20 സുഡാമേരിക്കാനോ മത്സരത്തിൽ ബ്രസീലിന് വിജയം. ചിരവൈരികളായ അർജന്റീനയാണ് ബ്രസീൽ ഒന്നിനെതിരെ 3 ഗോളുകൾക്ക് തോൽപ്പിച്ചിട്ടുള്ളത്. വിജയത്തോടെ അടുത്ത ഘട്ടത്തിലേക്ക് മുന്നേറാൻ ബ്രസീലിന് സാധിച്ചിട്ടുണ്ട്. അതേസമയം രണ്ട് തോൽവികൾ വഴങ്ങിയതോടെ അർജന്റീന പുറത്താവലിന്റെ വക്കിലാണ്.

അർജന്റീന ഇതിഹാസമായ ഹവിയർ മഷരാനോയാണ് അണ്ടർ 20 ടീമിനെ പരിശീലിപ്പിക്കുന്നത്. ബ്രസീലിന് വേണ്ടി ബിറോ,സാന്റോസ്‌,റോക്കെ എന്നിവരാണ് ഗോളുകൾ നേടിയിട്ടുള്ളത്. അർജന്റീനയുടെ ആശ്വാസ ഗോൾ ഗോൺസാലസിന്റെ വകയായിരുന്നു.മത്സരത്തിൽ ഒരു പെനാൽറ്റി അർജന്റീനക്ക് അനുകൂലമായി ലഭിച്ചിരുന്നുവെങ്കിലും അർജന്റീനയുടെ നായകനായ ഇൻഫാൻഡിനോ അത് പാഴാക്കുകയായിരുന്നു.

തുടർച്ചയായ രണ്ടാം തോൽവിയാണ് അർജന്റീന ഇപ്പോൾ വഴങ്ങുന്നത്. ആദ്യ മത്സരത്തിൽ പരാഗ്വയോട് അർജന്റീന പരാജയപ്പെട്ടിരുന്നു.ഇതോടെ ഗ്രൂപ്പിൽ ഒരൊറ്റ പോയിന്റ് പോലും നേടാൻ സാധിക്കാതെ അർജന്റീന നാലാം സ്ഥാനത്താണ്.

അതേസമയം കളിച്ച രണ്ടു മത്സരങ്ങളിലും വിജയം നേടിക്കൊണ്ട് 6 പോയിന്റ് നേടാൻ ബ്രസീലിന് കഴിഞ്ഞിട്ടുണ്ട്.നിലവിൽ രണ്ടാം സ്ഥാനത്താണ് ബ്രസീൽ ഉള്ളത്. മൂന്ന് മത്സരങ്ങളിൽ നിന്ന് 7പോയിന്റ് ഉള്ള പരാഗ്വയാണ് ഒന്നാം സ്ഥാനത്തുള്ളത്.