വേൾഡ് കപ്പ് യോഗ്യതാ മത്സരങ്ങൾ, അർജന്റീന ടീമിലേക്ക് ഒരു താരത്തെ കൂടി ഉൾപ്പെടുത്തി സ്കലോണി.

വരുന്ന ഇന്റർനാഷണൽ ബ്രേക്കിൽ 2 വേൾഡ് കപ്പ് യോഗ്യത മത്സരങ്ങളാണ് നിലവിലെ ചാമ്പ്യന്മാരായ അർജന്റീന കളിക്കുക. ആദ്യ മത്സരത്തിൽ പരാഗ്വയാണ് അർജന്റീനയുടെ എതിരാളികൾ. ഒക്ടോബർ 13 ആം തീയതി പുലർച്ചെ 4:30നാണ് ഈയൊരു മത്സരം അരങ്ങേറുക. പിന്നീട് ഒക്ടോബർ 18 ആം തീയതി പെറുവിനെ അർജന്റീന നേരിടും. ഇന്ത്യൻ സമയം രാവിലെ 7:30നാണ് ഈയൊരു മത്സരം അരങ്ങേറുക.

ഈ മത്സരത്തിനുള്ള സ്‌ക്വാഡ് അർജന്റീനയുടെ പരിശീലകനായ ലയണൽ സ്കലോണി കഴിഞ്ഞ ദിവസം പ്രഖ്യാപിച്ചിട്ടുണ്ട്. 34 താരങ്ങൾ ഉള്ള ഒരു വലിയ ടീമിനെ തന്നെയാണ് ഇദ്ദേഹം തിരഞ്ഞെടുത്തിട്ടുള്ളത്.അതിൽ 6 താരങ്ങൾ അർജന്റീനയുടെ അണ്ടർ 23 ടീമിലെ താരങ്ങളാണ്. അതേസമയം ചില പ്രധാന താരങ്ങൾക്ക് പരിക്ക് മൂലം ടീമിലെ സ്ഥാനം നഷ്ടമായിരുന്നു. മാത്രമല്ല ടാക്ടിക്കൽ റീസണുകൾ കാരണം അർജന്റീനയുടെ കോച്ച് ചില താരങ്ങളെ ഒഴിവാക്കുകയും ചെയ്തിരുന്നു.

അത്തരത്തിലുള്ള ഒരു താരമായിരുന്നു ഡിഫന്ററായ ഫക്കുണ്ടോ മെഡിന. എന്നാൽ സ്കലോണിയുടെ മനസ്സ് മാറിയിട്ടുണ്ട്.ലെൻസിന്റെ താരമായ ഇദ്ദേഹത്തെ ഇപ്പോൾ ടീമിലേക്ക് കോച്ച് ഉൾപ്പെടുത്തി കഴിഞ്ഞു. ഇതോടുകൂടി 35 താരങ്ങളുമായാണ് ഈ മത്സരങ്ങൾക്ക് അർജന്റീന വരിക. ഏതായാലും രണ്ട് മത്സരങ്ങളിലും വിജയം നേടുക എന്ന ഒരു ലക്ഷ്യം തന്നെയായിരിക്കും അർജന്റീനക്ക് ഉണ്ടാവുക.