വീണ്ടും മൂന്നടിച്ചു, അസൂറിപ്പടയുടെ അപരാജിത കുതിപ്പ് തുടരുന്നു!

ഇന്നലെ നടന്ന മത്സരത്തിൽ കരുത്തരായ ഇറ്റലിക്ക് വിജയം.എതിരില്ലാത്ത മൂന്ന് ഗോളുകൾക്കാണ് ഇറ്റലി സ്വിറ്റ്സർലാന്റിനെ തകർത്തു വിട്ടത്. കഴിഞ്ഞ മത്സരത്തിലും ഇതേ സ്കോറിന് തന്നെയായിരുന്നു ഇറ്റലി തുർക്കിയെ പരാജയപ്പെടുത്തിയത്. ഇതോടെ ആറ് പോയിന്റുകൾ കരസ്ഥമാക്കി ഇറ്റലി ഏറെക്കുറെ നോക്കോട്ട് റൗണ്ട് ഉറപ്പിച്ചു. ഇറ്റലിയുടെ അപരാജിതകുതിപ്പ് തുടരുകയാണ്. 2018 സെപ്റ്റംബറിന് ശേഷം ഇതുവരെ ഇറ്റലി പരാജയം അറിഞ്ഞിട്ടില്ല.ഇരട്ടഗോളുകൾ നേടിയ മാനുവൽ ലൊക്കാടെല്ലിയാണ് ഇറ്റലിയുടെ വിജയശില്പി.ശേഷിച്ച ഗോൾ സൂപ്പർ താരം സിറോ ഇമ്മോബിലെ നേടി.

മത്സരത്തിന്റെ 19-ആം മിനുട്ടിൽ കെയ്ലെനി ഗോൾ നേടിയെങ്കിലും ഫൗൾ കാരണം അത്‌ അസാധുവാക്കുകയായിരുന്നു.എന്നാൽ 26-ആം മിനുട്ടിൽ ബെറാർഡിയുടെ അസിസ്റ്റിൽ നിന്നും ലൊക്കാടെല്ലി വലകുലുക്കി.52-ആം മിനിറ്റിലാണ് ലൊക്കാടെല്ലി രണ്ടാം ഗോൾ നേടുന്നത്.ഇത്തവണ നിക്കോളോ ബറെല്ലയായിരുന്നു അസിസ്റ്റ് നൽകിയത്.89-ആം മിനിറ്റിൽ ടോളോയിയുടെ അസിസ്റ്റിൽ നിന്നും ഇമ്മോബിലെ കൂടി ഗോൾ നേടിയതോടെ അസൂറികളുടെ ഗോൾ പട്ടിക പൂർത്തിയായി. ഇനി വെയിൽസിനെതിരെയാണ് അടുത്ത മത്സരം.