വിരമിക്കൽ സൂചനയോ? ഖത്തറിലേക്ക് തന്റെ അവസാനത്തെ വേൾഡ് കപ്പെന്ന് ലയണൽ മെസ്സി!

ലയണൽ മെസ്സി അർജന്റീനക്കൊപ്പം തന്റെ അഞ്ചാമത്തെ വേൾഡ് കപ്പിനുള്ള ഒരുക്കത്തിലാണ് നിലവിലുള്ളത്.വരുന്ന ഖത്തർ വേൾഡ് കപ്പിലെ കിരീടം ഫേവറേറ്റുകളിൽ മുന്നിൽ നിൽക്കുന്ന ടീമാണ് അർജന്റീന. ഇത്തവണയെങ്കിലും മെസ്സിക്ക് വേൾഡ് കപ്പ് കിരീടം ചൂടാനുള്ള ഭാഗ്യം ലഭിക്കുമോ എന്നുള്ളത് ആരാധകർ ഏറെ നോക്കിക്കാണുന്ന ഒരു കാര്യമാണ്.

ലയണൽ മെസ്സിയുടെ അവസാനത്തെ വേൾഡ് കപ്പായി കൊണ്ട് ഈ വേൾഡ് കപ്പിന് നേരത്തെ തന്നെ വിലയിരുത്തപ്പെട്ടതാണ്.ഇപ്പോഴിതാ തന്റെ ആരാധകരോട് ലയണൽ മെസ്സി അക്കാര്യം തന്നെ തുറന്നു പറഞ്ഞിട്ടുണ്ട്. ഇത് തന്റെ അവസാനത്തെ വേൾഡ് കപ്പ് ആണ് എന്നുള്ള കാര്യം ലയണൽ മെസ്സി തന്നെ സ്ഥിരീകരിക്കുകയായിരുന്നു. ഈയിടെ സ്റ്റാർ പ്ലസിന് നൽകിയ അഭിമുഖത്തിലാണ് ലയണൽ മെസ്സി ഇക്കാര്യം സ്ഥിരീകരിച്ചിട്ടുള്ളത്.

” തീർച്ചയായും ഇത് എന്റെ അവസാനത്തെ വേൾഡ് കപ്പ് ആണ്.ഈ വേൾഡ് കപ്പിലേക്കുള്ള ദിവസങ്ങൾ ഞാൻ എണ്ണി കൊണ്ടിരിക്കുകയാണ്.അതേസമയം ചെറിയ രൂപത്തിലുള്ള ഉത്കണ്ഠയും വ്യാകുലതയുമൊക്കെ എനിക്കുണ്ട്.പക്ഷേ എന്താണ് സംഭവിക്കാൻ പോകുന്നത് എന്നുള്ളതിന് മാത്രമാണ് പ്രാധാന്യം.വേൾഡ് കപ്പ് എത്തുന്നത് വരെ വെറുതെ കാത്തിരിക്കാൻ ഞങ്ങൾക്ക് കഴിയില്ല. നിങ്ങൾ അതിനു വേണ്ടി തയ്യാറെടുക്കണം ” ഇതാണ് മെസ്സി പറഞ്ഞിട്ടുള്ളത്.

2006ലെ വേൾഡ് കപ്പിലാണ് ലയണൽ മെസ്സി ആദ്യമായി പങ്കെടുക്കുന്നത്.2010,2014,2018 എന്നീ വേൾഡ് കപ്പുകളിൽ മെസ്സി അർജന്റീനക്ക് വേണ്ടി കളിച്ചു. 2014ൽ അർജന്റീനക്ക് കയ്യെത്തും ദൂരത്താണ് കിരീടം നഷ്ടമായത്. ഇത്തവണ ആ കിരീടം തിരിച്ചുപിടിക്കാൻ കഴിയുമോ എന്നുള്ളതാണ് ആരാധകർക്കറിയേണ്ടത്.