ലോകത്തെ ഏറ്റവും മികച്ച ആരാധകരാണ് അർജന്റൈൻ ആരാധകർ : ലയണൽ സ്കലോണി

ഖത്തർ വേൾഡ് കപ്പിന്റെ കലാശ പോരാട്ടത്തിൽ ഫ്രാൻസും അർജന്റീനയും തമ്മിലാണ് ഏറ്റുമുട്ടുന്നത്. ഇന്ന് രാത്രി ഇന്ത്യൻ സമയം 8:30നാണ് ഈയൊരു മത്സരം അരങ്ങേറുക.ലുസൈൽ സ്റ്റേഡിയമാണ് ഈ മത്സരത്തിന് സാക്ഷ്യം വഹിക്കുക. രണ്ട് കരുത്തുറ്റ ടീമുകൾ തമ്മിൽ ഏറ്റുമുട്ടുന്നതിനാൽ തികച്ചും അപ്രവചനീയമായ ഒരു മത്സരമാണ് ആരാധകരെ കാത്തിരിക്കുന്നത്.

ഈ മത്സരത്തിന് മുന്നോടിയായുള്ള പത്രസമ്മേളനത്തിൽ അർജന്റീനയുടെ പരിശീലകനായ ലയണൽ സ്കലോണി അർജന്റീന ആരാധകരെ കുറിച്ച് സംസാരിച്ചിട്ടുണ്ട്.അതായത് ലോകത്തെ ഏറ്റവും മികച്ച ആരാധകരാണ് അർജന്റീന ആരാധകർ എന്നാണ് പരിശീലകൻ ഇപ്പോൾ പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ Tyc സ്പോർട്സ് റിപ്പോർട്ട് ചെയ്യുന്നത് ഇങ്ങനെയാണ്.

” എന്റെ ഇമോഷനുകൾ ഞങ്ങളുടെ കൾച്ചറിന്റെ ഭാഗമാണ്.ലോകത്തിലെ ഏറ്റവും മികച്ച ആരാധകരാണ് അർജന്റീന ആരാധകർ. ഫുട്ബോൾ എന്നുള്ളത് അർജന്റീനക്കാർക്ക് ഒരു കായിക വിനോദത്തിനേക്കാൾ മുകളിലാണ്. ഈ വേൾഡ് കപ്പ് അവരെ സന്തോഷിപ്പിക്കുന്നു.അതെനിക്ക് ഒരുപാട് സന്തോഷം നൽകുന്ന കാര്യമാണ് ” ഇതാണ് അർജന്റീന കോച്ച് പറഞ്ഞിട്ടുള്ളത്.

ഏതായാലും ദീർഘ കാലത്തിനു ശേഷം വേൾഡ് കപ്പ് കിരീടം നേടാൻ അർജന്റീനക്ക് കഴിയുമോ എന്നുള്ളതാണ് ആരാധകർ ഉറ്റു നോക്കുന്നത്.അതേസമയം കിരീടം നിലനിർത്തുക എന്ന ലക്ഷ്യത്തോടുകൂടിയാണ് ഫ്രാൻസ് വരുന്നത്.