ലോകത്തിലെ ഏറ്റവും മികച്ച താരം, അതിൽ കൂടുതലൊന്നും പറയാനില്ല : CR7 നെ കുറിച്ച് സാന്റോസ്!

ഇന്നലെ യുവേഫ നേഷൻസ് ലീഗിൽ നടന്ന മത്സരത്തിൽ എതിരില്ലാത്ത നാലു ഗോളുകൾക്കായിരുന്നു പോർച്ചുഗൽ സ്വിറ്റ്സർലാന്റിനെ പരാജയപ്പെടുത്തിയത്. സൂപ്പർ താരം ക്രിസ്റ്റ്യാനോ റൊണാൾഡോ തന്നെയാണ് പോർച്ചുഗല്ലിനെ മുന്നിൽ നിന്ന് നയിച്ചത്. രണ്ട് ഗോളുകൾ നേടിയ താരം ഒരു അസിസ്റ്റും കരസ്ഥമാക്കിയിട്ടുണ്ട്. ഇതോടെ പോർച്ചുഗല്ലിന് വേണ്ടി ആകെ 117 ഗോളുകൾ പൂർത്തിയാക്കാൻ റൊണാൾഡോക്ക് സാധിച്ചിട്ടുണ്ട്.

ഏതായാലും താരത്തെ പ്രശംസിച്ചു കൊണ്ട് പോർച്ചുഗല്ലിന്റെ പരിശീലകനായ ഫെർണാണ്ടോ സാന്റോസ് രംഗത്ത് വന്നിട്ടുണ്ട്. അതായത് ലോകത്തിലെ ഏറ്റവും മികച്ച താരമാണ് റൊണാൾഡോയെന്നും അതിൽ കൂടുതലൊന്നും തനിക്ക് പറയാനില്ല എന്നാണ് പോർച്ചുഗീസ് പരിശീലകൻ പറഞ്ഞിട്ടുള്ളത്. മത്സര ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.സാന്റോസിന്റെ വാക്കുകൾ ഇങ്ങനെയാണ്.

” എന്താണ് ഇനി കൂടുതൽ പറയേണ്ടത് എന്നെനിക്കറിയില്ല. ഞാൻ പറഞ്ഞത് തന്നെ വീണ്ടും പറയുകയാണ്. ലോകത്തിലെ ഏറ്റവും മികച്ച താരമാണ് ക്രിസ്റ്റ്യാനോ റൊണാൾഡോ. ഇതിൽ കൂടുതൽ ഞാനെന്ത് പറയാനാണ്?ഞാൻ എല്ലാം പറഞ്ഞു കഴിഞ്ഞു ” ഇതാണ് സാന്റോസ് പറഞ്ഞിട്ടുള്ളത്.

അതേസമയം ടീമിന്റെ വിജയത്തിൽ അദ്ദേഹം സന്തോഷം പ്രകടിപ്പിച്ചിട്ടുണ്ട്. അതായത് താൻ വളരെയധികം ഹാപ്പിയാണെന്നും മത്സരത്തിൽ വളരെയധികം മികച്ച പ്രകടനമാണ് പോർച്ചുഗൽ പുറത്തെടുത്തത് എന്നുമാണ് ഇദ്ദേഹം കൂട്ടിചേർത്തിട്ടുള്ളത്.