യൂറോ കപ്പ് :ഗോൾഡൻ ബൂട്ട് നേടി ക്രിസ്റ്റ്യാനോ!

ഇംഗ്ലണ്ടിനെ പരാജയപ്പെടുത്തി കൊണ്ട് ഇത്തവണത്തെ യൂറോ കപ്പിൽ മുത്തമിടാൻ ഇറ്റലിക്ക്‌ സാധിച്ചിരുന്നു. ഇതോടെ രണ്ടാം തവണയാണ് അസൂറിപ്പട യൂറോ കപ്പ് സ്വന്തമാക്കുന്നത്. ഇംഗ്ലണ്ടിനാവട്ടെ ഇതുവരെ യൂറോ കപ്പ് ലഭിച്ചിട്ടുമില്ല. ഏതായാലും ഈ ടൂർണമെന്റിൽ ഏറ്റവും കൂടുതൽ ഗോളടിച്ച താരത്തിന് നൽകുന്ന പുരസ്‌കാരമായ ഗോൾഡൻ ബൂട്ടിനുടമ മാറ്റാരുമല്ല, സൂപ്പർ താരം ക്രിസ്റ്റ്യാനോ റൊണാൾഡോയാണ്. യൂറോ തന്നെയാണ് ഔദ്യോഗിക ടോപ് സ്‌കോററെ പുറത്ത് വിട്ടിട്ടുള്ളത്.

പോർച്ചുഗൽ പ്രീ ക്വാർട്ടറിൽ പുറത്തയെങ്കിലും ചുരുങ്ങിയ മത്സരംങ്ങൾക്കുള്ളിൽ തന്നെ കൂടുതൽ ഗോളുകൾ നേടാൻ റൊണാൾഡോക്ക്‌ സാധിച്ചിരുന്നു.360 മിനുട്ട് മാത്രം കളിച്ച റൊണാൾഡോ 5 ഗോളും ഒരു അസിസ്റ്റുമാണ് നേടിയിട്ടുള്ളത്.അതേസമയം അഞ്ച് ഗോളുകൾ നേടിയ ചെക്ക് താരം പാട്രിക് ഷിക്ക്‌ പിറകിലുണ്ട്.404 മിനുട്ടുകൾ കളിച്ച് കൊണ്ടാണ് ഷിക്ക്‌ അഞ്ചു ഗോളുകൾ നേടിയിട്ടുള്ളത്.മൂന്നാമത് ഫ്രഞ്ച് സൂപ്പർ താരം കരിം ബെൻസിമയാണ്.349 മിനിറ്റുകൾ കളിച്ച താരം 4 ഗോളുകളാണ് ഈ യൂറോയിൽ നേടിയിട്ടുള്ളത്. ഏതായാലും ഈ മുപ്പത്തിയാറാം വയസ്സിലും തന്റെ ഗോളടി മികവിന് ഒരു കോട്ടവും തട്ടിയിട്ടില്ലെന്ന് തെളിയിക്കുന്നതാണ് റൊണാൾഡോയുടെ ഈ നേട്ടം.