യുവന്റസ് വിട്ടേക്കും, ക്രിസ്റ്റ്യാനോ കരിയർ അവസാനിപ്പിക്കാൻ ആഗ്രഹിക്കുന്നത് ആ ക്ലബ്ബിൽ!

സൂപ്പർ താരം ക്രിസ്റ്റ്യാനോ റൊണാൾഡോയുടെ ഭാവിയെ പറ്റി നിരവധി അഭ്യൂഹങ്ങൾ പ്രചരിക്കുന്നുണ്ട്. അതിൽ പ്രധാനപ്പെട്ടത് ക്രിസ്റ്റ്യാനോ ഈ സീസണോട് കൂടി യുവന്റസ് വിടുമെന്നുള്ളതാണ്. യുവന്റസിന്റെ മോശം പ്രകടനത്തിൽ താരം അസ്വസ്ഥനാണ് എന്നാണ് വാർത്തകൾ. അത്‌ മാത്രമല്ല ക്രിസ്റ്റ്യാനോയെ കൈവിടാനും യുവന്റസ് ആലോചിക്കുന്നുണ്ട് എന്ന വാർത്തകളും സജീവമാണ്. ഇതിനിടെ മറ്റൊരു റിപ്പോർട്ട്‌ പുറത്ത് വിട്ടിരിക്കുകയാണ് പോർച്ചുഗീസ് മാധ്യമമായ റെക്കോർഡ്. ക്രിസ്റ്റ്യാനോ റൊണാൾഡോ യുവന്റസ് വിട്ടു കൊണ്ട് തന്റെ കുട്ടിക്കാല ക്ലബായ സ്പോർട്ടിങ് ലിസ്ബണിലെക്ക് മടങ്ങിയെത്തുമെന്നും സ്പോർട്ടിങ്ങിൽ കരിയർ അവസാനിപ്പിക്കാനാണ് ക്രിസ്റ്റ്യാനോ ഇഷ്ടപ്പെടുന്നത് എന്നുമാണ് ഇവർ റിപ്പോർട്ട്‌ ചെയ്തിരിക്കുന്നത്.താരത്തെ തിരികെ എത്തിക്കാൻ സ്പോർട്ടിങ് ഒരുങ്ങി കഴിഞ്ഞെന്നും ഇവർ കണ്ടെത്തിയിട്ടുണ്ട്. 2022 വരെയാണ് റൊണാൾഡോക്ക് യുവന്റസുമായി കരാർ അവശേഷിക്കുന്നത്.

നാല്പതാം വയസ്സ് വരെ കളിക്കാൻ ക്രിസ്റ്റ്യാനോ റൊണാൾഡോ ഇഷ്ടപ്പെടുന്നുണ്ടെന്നും സ്പോർട്ടിങ്ങിലേക്ക് മടങ്ങുന്നതിൽ താരത്തിന്റെ കുടുംബം സമ്മതം അറിയിച്ചിട്ടുണ്ടെന്നും ഇവർ കൂട്ടിച്ചേർക്കുന്നുണ്ട്. തന്റെ മുൻകാല ക്ലബുകളായ റയൽ മാഡ്രിഡ്‌, മാഞ്ചസ്റ്റർ യുണൈറ്റഡ് എന്നീ ക്ലബുകളിൽ ഒന്നിലേക്ക് തിരികെ പോവാൻ റൊണാൾഡോ തന്റെ ഏജന്റ് ആയ മെൻഡസ് വഴി ശ്രമം നടത്തിയിരുന്നു. എന്നാൽ റയൽ ഇത്‌ നിരസിക്കുകയായിരുന്നു. മാഞ്ചസ്റ്റർ യുണൈറ്റഡ് ഇക്കാര്യത്തിൽ അന്തിമ തീരുമാനം കൈകൊണ്ടിട്ടുമില്ല.ഏതായാലും ഈ റൂമറുകളുടെ ഇടയിലേക്ക് സ്പോർട്ടിങ് ലിസ്ബൺ കൂടി രംഗപ്രവേശനം ചെയ്തിട്ടുണ്ട്. താരം യുവന്റസ് വിടാനുള്ള സാധ്യതകൾ വർധിച്ചു കൊണ്ടിരിക്കുകയാണ്.