മെസ്സി എംഎൽഎസ്സിലേക്ക് വന്നാൽ ഞാൻ അദ്ദേഹത്തിന്റെ പാദങ്ങളെ ചുംബിക്കും : അർജന്റൈൻ താരം!

താൻ കളിക്കാനാഗ്രഹിക്കുന്ന സ്ഥലം എവിടെയെന്ന് മെസ്സി തുറന്നു പറഞ്ഞത് ഒരേയൊരു സ്ഥലത്തെ കുറിച്ച് മാത്രമായിരുന്നു. അമേരിക്കയിലെ എംഎൽഎസ്സിൽ കളിക്കാൻ ആഗ്രഹിക്കുന്നു എന്നായിരുന്നു മെസ്സി മുമ്പ് നൽകിയ അഭിമുഖത്തിൽ വെളിപ്പെടുത്തിയിരുന്നത്. ഇതേതുടർന്ന് ബെക്കാമിന്റെ ഉടമസ്ഥതയിലുള്ള ഇന്റർമിയാമി മെസ്സിക്ക് വേണ്ടി ഭാവിയിൽ ശ്രമങ്ങൾ നടത്തുമെന്ന റിപ്പോർട്ടുകൾ ഉണ്ടായിരുന്നു. ഏതായാലും ഇപ്പോഴിതാ മെസ്സി എംഎൽഎസ്സിലേക്ക് വരുന്നതിനെ കുറിച്ച് മനസ്സ് തുറന്നിരിക്കുകയാണ് അർജന്റൈൻ ഫുട്ബോളറായ ഫ്രാങ്കോ ജാറ. എംഎൽഎസ്സിലെ എഫ്സി ഡല്ലാസിന് വേണ്ടിയാണ് ജാറ നിലവിൽ കളിക്കുന്നത്. മെസ്സി എംഎൽഎസ്സിലേക്ക് വന്നാൽ ഞാൻ അദ്ദേഹത്തിന്റെ പാദങ്ങളിൽ ചുംബിക്കുമെന്നാണ് കഴിഞ്ഞ ദിവസം 90 മിനുട്ടിന് നൽകിയ അഭിമുഖത്തിൽ ഇദ്ദേഹം പ്രസ്താവിച്ചത്.

” മെസ്സി എംഎൽഎസ്സിലേക്ക് വരികയാണെങ്കിൽ ഞാൻ അദ്ദേഹത്തിന്റെ കാൽപാദങ്ങളിൽ ചുംബിക്കും.അദ്ദേഹം വരികയാണെങ്കിൽ അതൊരു വിസ്‌ഫോടനാത്മകമായ സംഭവമായിരിക്കും.ഞാൻ എന്റെ കരിയറിൽ അദ്ദേഹത്തിടൊപ്പമോ അദ്ദേഹത്തിനെതിരെയോ കളിക്കാൻ കാത്തിരിക്കുകയായിരുന്നു. അവർ സ്ലാട്ടനെയും ഹിഗ്വയ്നേയും എംഎൽഎസ്സിലേക്ക് കൊടുന്നവരാണ്. അവർ മെസ്സിയെയും കൊണ്ടുവരുമെന്നാണ് ഞാൻ പ്രതീക്ഷിക്കുന്നത്.മെസ്സിക്കും ക്രിസ്റ്റ്യാനോക്കും ഫുട്ബോളിനുമപ്പുറത്തേക്ക് നല്ലൊരു ജീവിതം നയിക്കാൻ ഇവിടെ അമേരിക്കയിൽ സാധിക്കും.ഒരു സാധാരണ വ്യക്തിയായി നല്ല രീതിയിൽ അവർക്ക് അമേരിക്കയിൽ കഴിയാം ” ജാറ പറഞ്ഞു.