മെസ്സിയും ക്രിസ്റ്റ്യാനോയും ഒരുമിച്ച് കളിക്കണമെന്ന് ടെവസ്

മെസ്സിയും ക്രിസ്റ്റ്യാനോ റൊണാൾഡോയും ഒരുമിച്ചു കളിക്കാൻ താൻ ആഗ്രഹിക്കുന്നതായി കാർലോസ് ടെവസ്. തന്റെ വിടവാങ്ങൽ മത്സരത്തിൽ ഇരുവരും ഒരുമിച്ചു കളിക്കണമെന്നാണ് താൻ ആഗ്രഹിക്കുന്നതെന്ന് ടെവസ് വെളിപ്പെടുത്തി. ഇരുവരെയും ഉൾപ്പെടുത്തി കൊണ്ട് ഒരു ഡ്രീം ഇലവനും കാർലോസ് ടെവസ് പുറത്തു വിട്ടു. ഡ്രീം ഇലവനെ കുറിച്ച് അദ്ദേഹത്തിന്റെ വാക്കുകൾ ഇങ്ങനെയായിരുന്നു. ” എനിക്ക് ഒരു ടീമിനെ വിളിച്ചു ചേർക്കാൻ സാധിച്ചിരുന്നുവെങ്കിൽ അത് ഇങ്ങനെ ആയിരിക്കും. ജിയാൻ ലൂയിജി ബുഫൺ, ഹ്യൂഗോ ഇബാറ, റിയോ ഫെർഡിനന്റ്, ഗബ്രിയേൽ ഹെയിൻസി, പാട്രിക് എവ്‌റ, ആന്ദ്രേ പിർലോ, പോൾ സ്‌കോൾസ്, പോൾ പോഗ്ബ, ക്രിസ്റ്റ്യാനോ റൊണാൾഡോ, ലയണൽ മെസ്സി, വെയ്‌ൻ റൂണി എന്നിങ്ങനെയായിരിക്കും ” ടെവസ് പറഞ്ഞു.

നിലവിൽ ബൊക്ക ജൂനിയേഴ്‌സ് താരമായ കാർലോസ് ആറു മാസം കൂടി ടീമിൽ തുടരും എന്ന് പ്രഖ്യാപിച്ചിരുന്നു. അതിന് ശേഷം വിരമിക്കാനാണ് അദ്ദേഹത്തിന്റെ പദ്ധതിയുണ്ടായിരുന്നത്. എന്നാൽ അവസരം ലഭ്യമായാൽ താൻ ഇനിയും യൂറോപ്പിലേക്ക് പോവുമെന്നും അദ്ദേഹം പറഞ്ഞു. ” ഞാൻ എന്റെ ഭാവിയുടെ എല്ലാ സാധ്യതകളും തുറന്നിടുകയാണ്. ഞാനൊരിക്കലും എന്റെ വാക്കിന്റെ അടിമയാവാൻ ഉദ്ദേശിക്കുന്നില്ല. തീർച്ചയായും ഞാൻ അർജന്റീനയിൽ തുടരുകയാണെങ്കിൽ അത് ബൊക്ക ജൂനിയേഴ്‌സിൽ ആയിരിക്കും. പക്ഷെ ആറ് മാസം വെസ്റ്റ്ഹാം യുണൈറ്റഡിൽ ചിലവഴിക്കാനും ഞാൻ ആഗ്രഹിക്കുന്നുണ്ട്. ഞാൻ യൂറോപ്പിൽ കളിച്ച മറ്റെല്ലാ ടീമുകളെയും ഞാൻ സ്നേഹിക്കുന്നുണ്ട് ” ടെവസ് റേഡിയോ ലാ റെഡിന് നൽകിയ അഭിമുഖത്തിൽ വ്യക്തമാക്കി.