മെസ്സിക്കൊപ്പം കളിക്കുക എന്നത് വലിയ സ്വപ്നം, ലൗറ്ററോ പറയുന്നു !

എഫ്സി ബാഴ്സലോണയിൽ ലയണൽ മെസ്സിക്കൊപ്പം കളിക്കാൻ കഴിയുക എന്നുള്ളത് തന്റെ വലിയ സ്വപ്നമാണെന്ന് ഇന്റർമിലാന്റെ അർജന്റൈൻ സൂപ്പർ താരം ലൗറ്ററോ മാർട്ടിനെസ്. കഴിഞ്ഞ ദിവസം സ്പോർട്ട്വീക്കിന് നൽകിയ അഭിമുഖത്തിലായിരുന്നു ഇതേകുറിച്ച് ലൗറ്ററോ മനസ്സ് തുറന്നത്. നാഷണൽ ടീമിൽ മെസ്സിക്കൊപ്പം കളിക്കുന്ന താരമാണ് ലൗറ്ററോ. എന്നാൽ കഴിഞ്ഞ ട്രാൻസ്ഫറിൽ താരം ബാഴ്സയിലേക്ക് ചേക്കേറാൻ ശ്രമങ്ങൾ നടത്തിയിരുന്നുവെങ്കിലും അത്‌ നടന്നില്ല. പക്ഷെ ഇപ്പോൾ ഇന്ററിൽ താൻ സന്തുഷ്ടനാണെന്നും ലൗറ്ററോ കൂട്ടിച്ചേർത്തു.

” മെസ്സിക്കൊപ്പം കളിക്കുക എന്നുള്ളത് എന്നെ സംബന്ധിച്ചെടുത്തോളം വളരെ വലിയ സ്വപ്നമാണ്. ലോകത്തിലെ ഏറ്റവും മികച്ച താരമാണ് അദ്ദേഹം. നാഷണൽ ടീമിൽ അദ്ദേഹത്തോടൊപ്പം കളിക്കാൻ എനിക്ക് അവസരം ലഭിച്ചിട്ടുണ്ട്. ഓരോ യുവതാരത്തിനും പ്രചോദനമാണ് അദ്ദേഹം ” ലൗറ്ററോ മെസ്സിയെ കുറിച്ച് പറഞ്ഞു. ” ഇന്ററിൽ ഞാൻ ഹാപ്പിയാണ്. മിലാൻ മഹത്തായ നഗരമാണ്. ഏജന്റും ക്ലബും തമ്മിൽ സംസാരിക്കുന്നുണ്ട്. ഈ വിഷയത്തിൽ ഞാൻ ശാന്തനാണ്. ഞാനിപ്പോൾ എന്നെ കൊണ്ടാവുന്നത് എല്ലാം ഇന്ററിന് നൽകും. പിന്നീട് ഞങ്ങൾ പുതിയ അഗ്രിമെന്റിൽ എത്തും ” ലൗറ്ററോ പറഞ്ഞു.