മുട്ടയേയും പൊട്ടിച്ചു വിട്ടു,മെസ്സി കുറിച്ചത് ചരിത്രം!

ഖത്തർ വേൾഡ് കപ്പിന്റെ കിരീടനേട്ടം ആഘോഷിക്കുന്ന തിരക്കിലാണ് ഇപ്പോൾ ലയണൽ മെസ്സിയും അർജന്റീനയും ഉള്ളത്.കലാശ പോരാട്ടത്തിൽ ഫ്രാൻസിനെ പരാജയപ്പെടുത്തി കൊണ്ടാണ് അർജന്റീന കിരീടം സ്വന്തമാക്കിയത്. അർജന്റീനയുടെ തലസ്ഥാനമായ ബ്യൂണസ്‌ അയേഴ്സിൽ വലിയ വരവേൽപ്പ് അർജന്റീനക്ക് ലഭിച്ചിരുന്നു.

ഇതിനിടെ നേരത്തെ ലയണൽ മെസ്സി ഒരു ഇൻസ്റ്റഗ്രാം റെക്കോർഡ് സ്വന്തമാക്കിയിരുന്നു. ഏറ്റവും കൂടുതൽ ലൈക്കുകൾ നേടുന്ന കായിക താരം എന്ന റെക്കോർഡ് ആയിരുന്നു മെസ്സി റൊണാൾഡോയിൽ നിന്നും സ്വന്തമാക്കിയിരുന്നത്. മെസ്സി വേൾഡ് കപ്പ് പിടിച്ച് നിൽക്കുന്ന ചിത്രമായിരുന്നു അതിവേഗം ലൈക്കിന്റെ കാര്യത്തിൽ കുതിച്ചിരുന്നത്.

ഇപ്പോഴിതാ ആ ചിത്രം ലോക റെക്കോർഡ് കുറിച്ചിട്ടുണ്ട്.അതായത് ഇൻസ്റ്റഗ്രാമിന്റെ ചരിത്രത്തിൽ ഏറ്റവും കൂടുതൽ ലൈക്കുകൾ സ്വന്തമാക്കിയ ചിത്രം എന്ന റെക്കോർഡ് ആണ് ഇപ്പോൾ മെസ്സി സ്വന്തമാക്കിയിട്ടുള്ളത്. വേൾഡ് റെക്കോർഡ് എഗ്ഗ് ആയിരുന്നു ഈ റെക്കോർഡ് കൈവശം വെച്ചിരുന്നത്. ഇൻസ്റ്റഗ്രാമിൽ ഏറ്റവും കൂടുതൽ ലൈക്കുകൾ കരസ്ഥമാക്കുക എന്ന ക്യാമ്പയിന്റെ ഭാഗമായിരുന്ന മുട്ടയുടെ ചിത്രമായിരുന്നു ഏറ്റവും കൂടുതൽ ലൈക്കുകൾ കരസ്ഥമാക്കിയിരുന്നത്.

56 മില്യണാണ് മുട്ടക്ക് ലഭിച്ചിരിക്കുന്ന ലൈക്ക്. അതേസമയം ലയണൽ മെസ്സിയുടെ ചിത്രത്തിന്റെ ലൈക്ക് 56.5 മില്യൺ കടന്നു കഴിഞ്ഞു. ഇപ്പോഴും ആ ഒരു ലൈക്ക് വർദ്ധിച്ചുകൊണ്ടിരിക്കുകയാണ്. ഏതായാലും കളത്തിന് പുറത്തും മെസ്സി ചരിത്രം സൃഷ്ടിച്ചു കൊണ്ടിരിക്കുന്ന കാഴ്ചയാണ് ഇപ്പോൾ കാണാൻ കഴിയുന്നത്.