മിന്നും വിജയത്തിന് പിന്നാലെ സൂപ്പർതാരത്തിന് പരിക്ക്, അർജന്റീനക്ക് ആശങ്ക!

ഇന്നലെ വേൾഡ് കപ്പിൽ നടന്ന മത്സരത്തിൽ വിജയം നേടാൻ വമ്പൻമാരായ അർജന്റീനക്ക് സാധിച്ചിരുന്നു. എതിരില്ലാത്ത രണ്ടു ഗോളുകൾക്കാണ് അർജന്റീന പോളണ്ടിനെ പരാജയപ്പെടുത്തിയത്.മാക്ക് ആല്ലിസ്റ്റർ,ഹൂലിയൻ ആൽവരസ് എന്നിവരുടെ ഗോളുകളാണ് അർജന്റീനയുടെ രക്ഷയ്ക്ക് എത്തിയത്.

മത്സരത്തിൽ മികച്ച പ്രകടനമായിരുന്നു അർജന്റീന പുറത്തെടുത്തിരുന്നത്.എന്നാൽ ഈ മിന്നും വിജയത്തിന് പിന്നാലെ അർജന്റീനക്ക് ആശങ്കപ്പെടുത്തുന്ന ഒരു കാര്യം കൂടി പുറത്തേക്ക് വന്നിട്ടുണ്ട്. അതായത് മുന്നേറ്റ നിരയിലെ സൂപ്പർതാരമായ എയ്ഞ്ചൽ ഡി മരിയക്ക് പരിക്കിന്റെ പ്രശ്നങ്ങളുണ്ട്.മസിൽ ഇഞ്ചുറിയാണ് താരത്തെ അലട്ടുന്നത്.

പ്രമുഖ അർജന്റീന മാധ്യമമായ Tyc സ്പോർട്സാണ് ഇക്കാര്യം റിപ്പോർട്ട് ചെയ്തിട്ടുള്ളത്. ഏതായാലും കൂടുതൽ പരിശോധനകൾക്ക് വിധേയമാക്കിയതിനുശേഷം മാത്രമേ വിശദവിവരങ്ങൾ ലഭിക്കുകയുള്ളൂ.പരിക്കേ ഗുരുതരമാവില്ല എന്ന് തന്നെയാണ് പ്രതീക്ഷിക്കപ്പെടുന്നത്. മത്സരത്തിന്റെ അറുപതാം മിനുട്ടിൽ താരത്തെ പിൻവലിച്ചുകൊണ്ട് പരേഡസിനെ സ്കലോനി കളത്തിലേക്ക് കൊണ്ടുവന്നിരുന്നു.

ഏതായാലും പ്രീ ക്വാർട്ടറിൽ അർജന്റീനയുടെ എതിരാളികൾ ഓസ്ട്രേലിയയാണ്. ആ മത്സരത്തിൽ ഡി മരിയ ഉണ്ടാവുമെന്ന് തന്നെയാണ് പ്രതീക്ഷിക്കപ്പെടുന്നത്.