മികച്ചത് മെസ്സിയോ റൊണാൾഡോയോ? ഓസിലിന്റെ മറുപടി ഇങ്ങനെ !

ഫുട്ബോൾ ലോകത്ത് ഒരിക്കലും അവസാനിക്കാത്ത ചോദ്യമാണ് ക്രിസ്റ്റ്യാനോ റൊണാൾഡോയാണോ ലയണൽ മെസ്സിയാണോ മികച്ച താരമെന്ന്. പല താരങ്ങൾക്കും പരിശീലകർക്കും ഫുട്ബോൾ പണ്ഡിതൻമാർക്കും ഇക്കാര്യത്തിൽ അവരുടേതായ അഭിപ്രായങ്ങളുണ്ട്. ചിലർക്ക് മെസ്സി മികച്ച താരമാവുമ്പോൾ ചിലർക്ക് ക്രിസ്റ്റ്യാനോ റൊണാൾഡോ മികച്ച താരമാവുന്നു. ഏതായാലും ഈ ചോദ്യം നേരിടേണ്ടി വന്നിരിക്കുകയാണിപ്പോൾ സൂപ്പർ താരമായ മെസ്യൂട്ട് ഓസിൽ. മെസ്സി-റൊണാൾഡോ എന്നിവരിൽ നിന്ന് ഒരാളെ തിരഞ്ഞെടുക്കാൻ പറഞ്ഞ ചോദ്യത്തിനാണ് മെസ്യൂട്ട് ഓസിൽ മറുപടി നൽകിയത്. താരത്തിന്റെ ട്വിറ്റെർ വഴിയാണ് ആഴ്സണൽ താരം റിപ്ലൈ നൽകിയത്. ഓസിലിന് ഇഷ്ടകൂടുതൽ ക്രിസ്റ്റ്യാനോ റൊണാൾഡോയോട് ആണെന്ന് മറുപടിയിൽ നിന്ന് വ്യക്തമാണ്.

” സ്പെയിനിലെ എക്കാലത്തെയും മികച്ച താരങ്ങളിൽ ഒരാളാണ് മെസ്സി എന്നുള്ളത് അദ്ദേഹം തെളിയിച്ചതാണ്. എന്നാൽ റൊണാൾഡോയുടെ കാര്യം ഇതിൽ നിന്നും അല്പം വ്യത്യസ്ഥമാണ്. അദ്ദേഹം കളിച്ച എല്ലാ രാജ്യങ്ങളിലും എപ്പോഴും മികച്ച താരം അദ്ദേഹമായിരുന്നു ” ഓസിൽ പറഞ്ഞു. മുമ്പ് ക്രിസ്റ്റ്യാനോ റൊണാൾഡോക്കൊപ്പം കളിക്കാൻ ഓസിലിന് അവസരം ലഭിച്ചിട്ടുണ്ട്. ഇരുവരും റയൽ മാഡ്രിഡിന് വേണ്ടിയാണ് ഒരുമിച്ച് കളിച്ചിട്ടുള്ളത്. അത്കൊണ്ട് തന്നെ തന്റെ മുൻസഹതാരത്തിന് മുൻഗണന നൽകാൻ ഓസിൽ ശ്രദ്ദിച്ചിരുന്നു. നിലവിൽ സാമൂഹികമാധ്യമങ്ങളിൽ സജീവമാണ് ഓസിൽ. ആഴ്സണലിൽ നിന്നും തഴയപ്പെട്ട ശേഷം ട്വിറ്റെറിൽ ലൈവ് കമന്ററിയൊക്കെ നടത്തി ഓസിൽ ശ്രദ്ധ പിടിച്ചു പറ്റിയിരുന്നു.