ബൊളീവിയക്കെതിരെ ബ്രസീലിനെ കാസമിറോ നയിക്കും !

നാളെ നടക്കുന്ന വേൾഡ് കപ്പ് യോഗ്യത റൗണ്ട് പോരാട്ടത്തിൽ ബൊളീവിയക്കെതിരെ ക്യാപ്റ്റന്റെ ആം ബാൻഡ് സൂപ്പർ താരം കാസമിറോ അണിയും. ഇന്നലെ നടന്ന പത്രസമ്മേളനത്തിൽ പരിശീലകൻ ടിറ്റെയാണ് ഇക്കാര്യം അറിയിച്ചത്. ഡാനി ആൽവസിന്റെ അഭാവത്തിലാണ് ടിറ്റെ കാസമിറോയെ നായകനായി നിയോഗിച്ചത്. മുമ്പ് റൊട്ടേഷൻ സമ്പ്രദായമായിരുന്നു ടിറ്റെ ഉപയോഗിച്ചിരുന്നത്.അതിന് ശേഷം നെയ്മർ ജൂനിയറെ ടിറ്റെ സ്ഥിരം ക്യാപ്റ്റൻ ആയി നിയമിച്ചിരുന്നു. എന്നാൽ പിന്നീട് ടിറ്റെ തന്നെ സ്ഥാനത്ത് നിന്ന് നെയ്മറെ നീക്കം ചെയ്യുകയായിരുന്നു. പിഎസ്ജിയിൽ ഒരു ആരാധകനുമായിട്ട് ഉണ്ടായ പ്രശ്നങ്ങൾ ആയിരുന്നു നെയ്‌മറെ മാറ്റാൻ ടിറ്റെയെ പ്രേരിപ്പിച്ചത്. പിന്നീട് കോപ്പ അമേരിക്കയിൽ ഡാനി ആൽവെസ് ബ്രസീലിനെ നയിക്കുകയായിരുന്നു. എന്നാലിപ്പോൾ ചെറിയ പരിക്കുകൾ കാരണം ഡാനി ആൽവസിന് ടീമിൽ ഇടം നേടാൻ കഴിഞ്ഞിട്ടില്ല.

ബൊളീവിയക്കെതിരെയുള്ള മത്സരത്തിലേക്ക് മാത്രമാണ് കാസമിറോയെ ടിറ്റെ നായകനാക്കി നിയോഗിച്ചിട്ടുള്ളത്. പത്രസമ്മേളനത്തിൽ ടിറ്റെ പറഞ്ഞ വാക്കുകൾ ഇങ്ങനെയാണ്. “നാളത്തെ മത്സരത്തിലെ ക്യാപ്റ്റൻ കാസമിറോയായിരിക്കും. ഈ സാഹചര്യത്തിൽ നമുക്ക് ഡാനി ആൽവസിനെ ലഭ്യമല്ല. ഈ മത്സരം വളരെയധികം പ്രത്യേകതകൾ നിറഞ്ഞതാണ്. അതിനാൽ കാസമിറോക്ക്‌ ക്യാപ്റ്റൻ സ്ഥാനം ഞാൻ നൽകുകയാണ്. എന്തെന്നാൽ നമ്മളെ നയിക്കാൻ കഴിവുള്ള താരങ്ങളിൽ ഒരാളാണ് അദ്ദേഹം ” ടിറ്റെ പറഞ്ഞു. അടുത്ത പെറുവിനെതിരെയുള്ള മത്സരത്തിൽ ഇനി ആര് ബ്രസീലിനെ നയിക്കുമെന്ന കാര്യം ടിറ്റെ അറിയിച്ചിട്ടില്ല. നാളെ രാവിലെ ഇന്ത്യൻ സമയം ആറു മണിക്കാണ് ബ്രസീൽ ബൊളീവിയയെ നേരിടുന്നത്.