ബാഴ്സയും ലിവർപൂളും നോട്ടമിട്ട പോർച്ചുഗീസ് സൂപ്പർ താരത്തെയും സൗദി അറേബ്യ റാഞ്ചി!

കഴിഞ്ഞ ജനുവരി ട്രാൻസ്ഫർ ജാലകത്തിലായിരുന്നു സൂപ്പർ താരം ക്രിസ്റ്റ്യാനോ റൊണാൾഡോയെ സൗദി അറേബ്യൻ ക്ലബ്ബായ അൽ നസ്ർ സ്വന്തമാക്കിയത്.അത് വലിയ ഒരു വിപ്ലവത്തിന് തുടക്കം കുറിച്ചത്.അതിന് പിന്നാലെ നിരവധി താരങ്ങൾ സൗദി അറേബ്യൻ ലീഗിൽ ആകൃഷ്ടരായി. സൂപ്പർ താരങ്ങളായ കരിം ബെൻസിമയും എങ്കോളോ കാന്റെയുമൊക്കെ ഇനി സൗദി അറേബ്യയിലാണ് കളിക്കുക.

ഇതിന് പിന്നാലെ മറ്റൊരു സൂപ്പർ താരത്തെക്കൂടി സൗദി അറേബ്യൻ ക്ലബ്ബായ അൽ ഹിലാൽ സ്വന്തമാക്കിയിട്ടുണ്ട്. പ്രീമിയർ ലീഗ് ക്ലബ്ബായ വോൾവ്സിന്റെ പോർച്ചുഗീസ് സൂപ്പർ താരമായ റൂബൻ നെവസിനെയാണ് അൽ ഹിലാൽ സ്വന്തമാക്കിയിട്ടുള്ളത്. താരത്തിന്റെ കാര്യത്തിൽ വോൾവ്സും അൽ ഹിലാലും ധാരണയിൽ എത്തിയിട്ടുണ്ട്. പ്രമുഖ ഫുട്ബോൾ ജേണലിസ്റ്റായ ഫാബ്രിസിയോ റൊമാനോയാണ് ഇക്കാര്യം റിപ്പോർട്ട് ചെയ്തിട്ടുള്ളത്.

ഒരു വർഷത്തെ കോൺട്രാക്ട് കൂടിയാണ് പ്രീമിയർ ലീഗ് ക്ലബ്ബുമായി നെവസിന് അവശേഷിക്കുന്നത്. 55 മില്യൺ യൂറോയാണ് ട്രാൻസ്ഫർ ഫീ ആയിക്കൊണ്ട് വോൾവ്സിന് ലഭിക്കുക. നേരത്തെ എഫ്സി ബാഴ്സലോണയും ലിവർപൂളും ഈ താരത്തിനു വേണ്ടി ശ്രമിച്ചിരുന്നു. പക്ഷേ അദ്ദേഹം സൗദി അറേബ്യയിലേക്ക് പോകാൻ തീരുമാനിച്ചത് ഏവരിലും ഇപ്പോൾ ഞെട്ടൽ ഉണ്ടാക്കിയിട്ടുണ്ട്.

സൂപ്പർ താരം ലയണൽ മെസ്സിക്ക് വേണ്ടി വലിയ രൂപത്തിലുള്ള പരിശ്രമങ്ങൾ നടത്തിയവരാണ് അൽ ഹിലാൽ. പക്ഷേ ആ ശ്രമങ്ങൾ ഫലം കാണാതെ പോവുകയായിരുന്നു.നെവസിനെ കൂടാതെ കൂലിബലിയെ കൂടി എത്തിക്കാനുള്ള ശ്രമങ്ങൾ അൽ ഹിലാൽ ഇപ്പോൾ നടത്തുന്നുണ്ട്. അതേസമയം ക്രിസ്റ്റ്യാനോ റൊണാൾഡോയുടെ ക്ലബ്ബായ അൽ നസ്ർ ഹാക്കിം സിയച്ചിനെ സ്വന്തമാക്കാനുള്ള ഒരുക്കത്തിലാണ്.ഏതായാലും നിലവിൽ നിരവധി താരങ്ങളാണ് യൂറോപ്പ് വിട്ടുകൊണ്ട് സൗദി അറേബ്യയിലേക്ക് ചേക്കേറുന്നത്.