പോർച്ചുഗല്ലിന്റെ തകർപ്പൻ വിജയം,റൊണാൾഡോയുടെ പ്രതികരണം ഇങ്ങനെ!

ഇന്നലെ യുവേഫ നേഷൻസ് ലീഗിൽ നടന്ന മത്സരത്തിൽ വമ്പൻമാരായ പോർച്ചുഗലിന് തകർപ്പൻ വിജയം. എതിരില്ലാത്ത നാല് ഗോളുകൾക്കാണ് പോർച്ചുഗൽ ചെക്ക് റിപ്പബ്ലിക്കിനെ പരാജയപ്പെടുത്തിയത്.രണ്ട് ഗോളുകൾ നേടിയ ഡിയോഗോ ഡാലോട്ടാണ് മത്സരത്തിൽ ഹീറോയായത്.ബ്രൂണോ ഫെർണാണ്ടസ്,ജോട്ട എന്നിവരാണ് ശേഷിച്ച ഗോളുകൾ നേടിയത്. ജയത്തോടെ ഗ്രൂപ്പിൽ ഒന്നാമത് എത്താനും പോർച്ചുഗല്ലിന് സാധിച്ചു.

സൂപ്പർതാരം റൊണാൾഡോ ഉൾപ്പെടെയുള്ള വമ്പൻ താരനിരയാണ് കളത്തിലേക്ക് ഇറങ്ങിയത്.33ആം മിനുട്ടിൽ ലിയാവോയുടെ അസിസ്റ്റിൽ നിന്ന് ഡാലോട്ട് ഗോൾ നേടുകയായിരുന്നു. പിന്നീട് ആദ്യ പകുതിയുടെ അവസാനത്തിൽ റൂയിയുടെ അസിസ്റ്റിൽനിന്ന് ബ്രൂണോ ഗോൾ നേടി. ഉടൻ ചെക്കിന് ലഭിച്ച പെനാൽറ്റി ഷിക്ക് പാഴാക്കുകയായിരുന്നു.

52ആം മിനുട്ടിൽ ബ്രൂണോയുടെ അസിസ്റ്റിൽ നിന്നായിരുന്നു ഡാലോട്ട് തന്റെ രണ്ടാം ഗോൾ നേടിയത്.82ആം മിനുട്ടിൽ റൊണാൾഡോയുടെ അസിസ്റ്റിൽ നിന്നും ജോട്ട കൂടി ഗോൾ കണ്ടെത്തിയോടെ ഗോൾ പട്ടിക പൂർണമാവുകയായിരുന്നു. നിലവിൽ പത്ത് പോയിന്റ് ഉള്ള പോർച്ചുഗല്ലാണ് ഒന്നാം സ്ഥാനത്ത്.

ഏതായാലും ഈ മത്സരത്തിലെ വമ്പൻ വിജയത്തിൽ സൂപ്പർതാരം ക്രിസ്റ്റ്യാനോ റൊണാൾഡോ സന്തോഷം പ്രകടിപ്പിച്ചിട്ടുണ്ട്. മാത്രമല്ല എല്ലാ ആരാധകർക്കും അദ്ദേഹം നന്ദി പറയുകയും ചെയ്തിട്ടുണ്ട്. തന്റെ സോഷ്യൽ മീഡിയയിലൂടെയാണ് റൊണാൾഡോ മെസ്സേജ് പങ്കു വെച്ചിട്ടുള്ളത്. അദ്ദേഹത്തിന്റെ വാക്കുകൾ ഇങ്ങനെയാണ്.

‘ വളരെ മികച്ച ഒരു മത്സരം. ടീമിന്റെ വളരെ പ്രധാനപ്പെട്ട ഒരു വിജയം. ഇനിയും ഞങ്ങൾ ഞങ്ങളുടെ ലക്ഷ്യത്തിൽ ശ്രദ്ധ കേന്ദ്രീകരിക്കുന്നത് തുടരുകതന്നെ ചെയ്യും. നിങ്ങളുടെ ഈയൊരു അത്ഭുതകരമായ പിന്തുണയ്ക്ക് പോർച്ചുഗീസ് ആരാധകരോട് ഞാൻ നന്ദി പറയുന്നു ” ഇതാണ് റൊണാൾഡോ കുറിച്ചിട്ടുള്ളത്.

ഇനി പോർച്ചുഗലിന്റെ അടുത്ത എതിരാളികൾ വമ്പന്മാരായ സ്പെയിൻ ആണ്. എന്നാൽ ഇന്നലെ നടന്ന മത്സരത്തിൽ സ്പെയിൻ സ്വിറ്റ്സർലാൻഡിനോട് പരാജയം ഏറ്റുവാങ്ങിയിരുന്നു.