പിസ്സ,ഹഗ്സ്,തമാശകൾ,ബ്രസീൽ ടീം ക്യാമ്പിലെ വിശേഷങ്ങൾ ഇങ്ങനെ!

കഴിഞ്ഞ വേൾഡ് കപ്പ് യോഗ്യതാ മത്സരത്തിൽ ചിലിയെ എതിരില്ലാത്ത നാലു ഗോളുകൾക്ക് പരാജയപ്പെടുത്താൻ ബ്രസീലിന് സാധിച്ചിരുന്നു. സൂപ്പർതാരങ്ങളായ നെയ്മർ ജൂനിയർ,വിനീഷ്യസ് ജൂനിയർ,ഫിലിപ്പെ കൂട്ടിഞ്ഞോ,റിച്ചാലീസൺ എന്നിവരായിരുന്നു ബ്രസീലിന് വേണ്ടി ഗോളുകൾ നേടിയത്.

ഈ മത്സരത്തിന് ശേഷമുള്ള ബ്രസീൽ ടീമിന്റെ ഒരു വീഡിയോ സിബിഎഫ് പങ്കുവെച്ചിട്ടുണ്ട്.ടീം ക്യാമ്പിലെ വിശേഷങ്ങളാണ് ആ ഒരു വീഡിയോയിൽ നമുക്ക് കാണാനാവുക.മത്സരശേഷം ലോക്കർ റൂമിൽ വെച്ച് ബ്രസീലിയൻ താരങ്ങൾ പിസ്സ കഴിച്ച് കൊണ്ട് സന്തോഷം പങ്കിടുന്നത് കാണാൻ സാധിക്കുന്നുണ്ട്.

അതിന് ശേഷം CBF ന്റെ പുതിയ പ്രസിഡന്റായ എഡ്നാൾഡോ റോഡ്രിഗസ് ഡ്രസിങ് റൂമിലേക്ക് കടന്നു വരികയായിരുന്നു.ചെറിയ ഒരു പ്രസംഗം അദ്ദേഹം നടത്തി.തിയാഗോ സിൽവയെ കുറിച്ചുള്ള അദ്ദേഹത്തിന്റെ തമാശ ഡ്രസിങ് റൂമിൽ ചിരിപടർത്തുകയായിരുന്നു.

പരിശീലകനായ ടിറ്റെ പിന്നീട് തന്റെ താരങ്ങളെ ഹഗ് ചെയ്യുന്ന കാഴ്ച്ചയാണ് പിന്നീട് നമുക്ക് കാണാൻ സാധിക്കുക.നെയ്മർ ജൂനിയർ അടക്കമുള്ളവർ മാനേജറെ ഹഗ് ചെയ്യുന്നുണ്ട്.കൂടാതെ തന്റെ പഴയ ശിഷ്യൻ കൂടിയായ അരാനെയെ കുറിച്ച് ടിറ്റെ രണ്ട് വാക്കുകൾ സംസാരിക്കുകയും ചെയ്തു. ഇതൊക്കെയാണ് നമുക്ക് ദൃശ്യങ്ങളിൽ കാണാൻ സാധിക്കുക.

ഏതായാലും ബ്രസീലിന്റെ അടുത്ത മത്സരം ബൊളീവിയക്കെതിരെയാണ്. വരുന്ന ബുധനാഴ്ച പുലർച്ചെ ഇന്ത്യൻ സമയം 5 മണിക്കാണ് ഈയൊരു മത്സരം അരങ്ങേറുക. സൂപ്പർതാരങ്ങളായ നെയ്മർ ജൂനിയർക്കും വിനീഷ്യസ് ജൂനിയർക്കും സസ്പെൻഷൻ മൂലം ഈ മത്സരം കളിക്കാനാവില്ല.