നെയ്മർ റൊണാൾഡോയേക്കാൾ മികച്ച താരമാണോ? ബ്രസീലിയൻ ഫുട്ബോൾ വിദഗ്ധർ പറയുന്നു!

കഴിഞ്ഞ ദിവസം ജപ്പാനെതിരെ നടന്ന സൗഹൃദ മത്സരത്തിൽ പെനാൽറ്റി ഗോൾ നേടി കൊണ്ട് ബ്രസീലിനെ വിജയത്തിലേക്കെത്തിക്കാൻ സൂപ്പർ താരം നെയ്മർ ജൂനിയർക്ക് സാധിച്ചിരുന്നു.ഈ ഗോളോട് കൂടി കരിയറിൽ ആകെ 415 ഗോളുകൾ നെയ്മർ പൂർത്തിയാക്കിയിട്ടുണ്ട്. ബ്രസീലിയൻ ഇതിഹാസമായ റൊണാൾഡോ നസാരിയോയെ ഇതിനോടകംതന്നെ നെയ്മർ മറികടന്നു.414 ഗോളുകളാണ് റൊണാൾഡോ തന്റെ കരിയറിൽ നേടിയിട്ടുള്ളത്.

ഈ കണക്കുകൾ വെച്ചു നോക്കുമ്പോൾ റൊണാൾഡോയേക്കാൾ മികച്ച താരമാണോ നെയ്മർ എന്നുള്ള ഒരു ചോദ്യം ഇവിടെ ഉയർന്നു വരുന്നുണ്ട്. പ്രമുഖ ബ്രസീലിയൻ മാധ്യമമായ UOL ഇക്കാര്യത്തിൽ ബ്രസീലിയൻ ഫുട്ബോൾ നിരീക്ഷകരുടെ അഭിപ്രായം തേടുകയും ചെയ്തിരുന്നു. അത്തരത്തിലുള്ള ചില ഫുട്ബോൾ പണ്ഡിറ്റുകളുടെ അഭിപ്രായങ്ങൾ നമുക്കൊന്ന് പരിശോധിക്കാം.

ആലിസിയ ക്ലയിൻ എന്ന വ്യക്തി പറയുന്നത് ഇങ്ങനെയാണ്. ” നെയ്മർ ഒരിക്കലും റൊണാൾഡോക്ക് മുകളിലല്ല.1994-ലെ വേൾഡ് കപ്പ് ബ്രസീൽ നേടുമ്പോൾ 17-കാരനായ റൊണാൾഡോ സ്‌ക്വാഡിലുണ്ട്.1998-ലെ ഫൈനലിൽ ബ്രസീലിനെ എത്തിക്കുന്നതിൽ റൊണാൾഡോക്ക് വലിയ പങ്കുണ്ട്.2002-ലെ വേൾഡ് കപ്പ് കിരീടം അദ്ദേഹം ബ്രസീലിന് നേടി കൊടുത്തു. ലോകത്തിലെ ഏറ്റവും മികച്ച താരത്തിനുള്ള പുരസ്കാരം പലതവണ നേടി. അതുകൊണ്ടുതന്നെ ഇവിടെ താരതമ്യത്തിന് പോലും സാധ്യത ഞാൻ കാണുന്നില്ല ” ഇതാണ് ഇവർ പറഞ്ഞിട്ടുള്ളത്.

ആൻഡ്രേ റോച്ച പറയുന്നത് ഇങ്ങനെയാണ്.” ദേശീയ ടീമിന്റെ കാര്യത്തിൽ നെയ്മറും റൊണാൾഡോയും തമ്മിൽ വലിയ അന്തരമുണ്ട്. മെസ്സിക്കും ക്രിസ്റ്റ്യാനോക്കും എത്തിപ്പിടിക്കാൻ പോലും ബുദ്ധിമുട്ട് ഉണ്ടാകുമായിരുന്ന രൂപത്തിലുള്ള ഒരു പിന്തുണ റൊണാൾഡോക്ക് പരിക്കിന് മുന്നേ ഉണ്ടായിരുന്നു. പക്ഷേ നെയ്മർ വേൾഡ് കപ്പ് നേടുകയാണെങ്കിൽ കാര്യങ്ങൾ തകിടം മറിഞ്ഞെക്കാം ” ഇതാണ് ഇദ്ദേഹം പറഞ്ഞിട്ടുള്ളത്.

ഡാനിലോ ലവിയേരി പറയുന്നത് ഇങ്ങനെയാണ്. ” നെയ്മർ റൊണാൾഡോയുടെ അടുത്തുപോലും എത്തില്ല. റൊണാൾഡോയെ മറികടക്കാനുള്ള പ്രതിഭ നെയ്മർക്കുണ്ടായിരുന്നു.പക്ഷെ അദ്ദേഹം PSG യിലേക്ക് പോയതോട് കൂടി അതെല്ലാം തകിടംമറിഞ്ഞു.നെയ്മർ മികച്ച താരം തന്നെയാണ്. പക്ഷേ റൊണാൾഡോയെക്കാൾ മികച്ചവനല്ല ” ഇതാണ് ഇദ്ദേഹം പറഞ്ഞിട്ടുള്ളത്.

ജൂക്ക ഫൗരി എന്ന വ്യക്തിയുടെ അഭിപ്രായം ഇങ്ങനെയാണ്. ” നെയ്മർ ഒരിക്കലും റൊണാൾഡോയേക്കാൾ മികച്ചവനല്ല. നെയ്മറെകാൾ എത്രയോ മികച്ച രൂപത്തിലാണ് റൊണാൾഡോ കളിച്ചിട്ടുള്ളത്” ഇതാണ് ഇദ്ദേഹം പറഞ്ഞിട്ടുള്ളത്.

ചുരുക്കത്തിൽ എല്ലാവരും ഇക്കാര്യത്തിൽ ഒരു അഭിപ്രായക്കാരാണ്. ഗോളുകളുടെ കണക്കിൽ നെയ്മർ റൊണാൾഡോയെ മറികടന്നെങ്കിലും സാഹചര്യവും പ്രാധാന്യവും പരിഗണിക്കുമ്പോൾ റൊണാൾഡോ തന്നെയാണ് മികച്ച താരം എന്നാണ് ഇവർ എല്ലാവരും പറഞ്ഞു വെക്കുന്നത്.