നെയ്മർ അസാധാരണ പ്രതിഭ, താരതമ്യം പാടില്ല : ടിറ്റെ!

ഇന്ന് വെനിസ്വേലക്കെതിരെ നടന്ന കോപ്പ അമേരിക്ക മത്സരത്തിൽ എതിരില്ലാത്ത മൂന്ന് ഗോളുകൾക്കാണ് ബ്രസീൽ വിജയിച്ചു കയറിയത്. മത്സരത്തിൽ ഒരു ഗോളും ഒരു അസിസ്റ്റുമായി നെയ്മർ പതിവ് പോലെ തിളങ്ങി. മാർക്കിഞ്ഞോസ് നേടിയ ആദ്യഗോളിന് പിറകിലും നെയ്മറുടെ കാലുകൾ ഉണ്ടായിരുന്നു. ബ്രസീലിന്റെ ഒട്ടുമിക്ക മുന്നേറ്റങ്ങൾക്കും നെയ്മറായിരുന്നു ചുക്കാൻ പിടിച്ചിരുന്നത്. ഏതായാലും മത്സരത്തിന് ശേഷം സൂപ്പർ താരത്തെ വാനോളം പുകഴ്ത്തിയിരിക്കുകയാണ് ബ്രസീലിയൻ പരിശീലകൻ ടിറ്റെ. നെയ്മർ അസാധാരണ പ്രതിഭയാണ് എന്നാണ് ടിറ്റെ അറിയിച്ചത്. എന്നാൽ മറ്റു ബ്രസീലിയൻ ഇതിഹാസങ്ങളുമായി താരതമ്യം ചെയ്യുന്നതിൽ അർത്ഥമില്ലെന്നും ടിറ്റെ അറിയിച്ചു.

” സാങ്കേതികപരമായി അസാധാരണ പ്രതിഭയുള്ള താരമാണ് നെയ്മർ.പക്ഷേ മുൻ കാലഘട്ടത്തിലെ താരങ്ങളുമായി അദ്ദേഹത്തെ താരതമ്യം ചെയ്യുക എന്നുള്ളത് അനീതിയാണ്.റൊമാരിയോയും റൊണാൾഡോയുമൊക്കെ അസാധാരണതാരങ്ങളായിരുന്നു.പക്ഷേ അവർ വ്യത്യസ്ഥ സാഹചര്യങ്ങളിൽ കളിച്ചവരാണ്.തീർച്ചയായും ഇത്തരം താരതമ്യം ചെയ്യുമ്പോൾ നമ്മൾ സൂക്ഷ്മത പുലർത്തേണ്ടതുണ്ട്. ബ്രസീലിനെ സംബന്ധിച്ചിടത്തോളം നെയ്മർ വളരെ പ്രധാനപ്പെട്ട താരമാണ്.പ്ലേ ക്രിയേറ്റ് ചെയ്യാൻ പറ്റിയ കാര്യക്ഷമമായ തന്ത്രമായിരുന്നു ഞങ്ങൾ ഒരുക്കിയിരുന്നത്.ബോൾ ഞങ്ങളുടെ പക്കൽ ഇല്ലാത്തപ്പോൾ പോലും ഞങ്ങളെ സഹായിക്കാൻ അദ്ദേഹത്തിന് കഴിഞ്ഞു ” ടിറ്റെ പറഞ്ഞു.