നീയൊരു ഭീമാകാരനാണ്, വിമർശനങ്ങളെ ഇന്ധനമാക്കൂ : നെയ്മറോട് റൊണാൾഡോ!

സൂപ്പർ താരം നെയ്മർ ജൂനിയർ പരിക്ക് ഒരിക്കൽ കൂടി വേട്ടയാടിയിരുന്നു.കഴിഞ്ഞ സെർബിയക്കെതിരെയുള്ള മത്സരത്തിലായിരുന്നു നെയ്മർക്ക് പരിക്കേറ്റത്. അതുകൊണ്ടുതന്നെ ബ്രസീലിന്റെ ഗ്രൂപ്പ് സ്റ്റേജ് മത്സരങ്ങളിൽ നെയ്മർ ജൂനിയർ ഇനി കളിക്കാനുള്ള സാധ്യത വളരെയധികം കുറവാണ്.

മാത്രമല്ല വലിയ രൂപത്തിലുള്ള അധിക്ഷേപങ്ങളും പരിഹാസങ്ങളുമാണ് നെയ്മർക്ക് സാമൂഹിക മാധ്യമങ്ങളിലൂടെ ഇപ്പോൾ ലഭിച്ചുകൊണ്ടിരിക്കുന്നത്. ഇതിനെതിരെ ബ്രസീലിയൻ ഇതിഹാസമായ റൊണാൾഡോ നസാരിയോ രംഗത്ത് വന്നിട്ടുണ്ട്. പൂർവാധികം ശക്തിയോടെ നെയ്മറോട് തിരിച്ചുവരാനാണ് റൊണാൾഡോ ആവശ്യപ്പെട്ടിട്ടുള്ളത്.അദ്ദേഹം ഇൻസ്റ്റഗ്രാമിൽ കുറിച്ച വാക്കുകൾ ഇങ്ങനെയാണ്.

” നീയൊരു ഭീമാകാരനാണ് നെയ്മർ.എന്നെപ്പോലെയുള്ള ഒരുപാട് ബ്രസീലുകാർ നിന്നെ ഇഷ്ടപ്പെടുകയും ആരാധിക്കുകയും ചെയ്യുന്നു.നിന്റെ പ്രതിഭ കൊണ്ട് നീ ഒരുപാട് ഉയരത്തിലാണ്. അതുകൊണ്ടാണ് ലോകത്തിന്റെ മുക്കിലും മൂലയിലും നിനക്ക് ആരാധകരുള്ളത്. പക്ഷേ ദുഷ്ട മനസ്സുള്ളവരാണ് നിന്റെ ഇഞ്ചുറി പോലും ആഘോഷിക്കുന്നവർ. എപ്പോഴും നിനക്കെതിരെ ആളുകൾ ഉണ്ടാവും.എന്നാൽ സമൂഹം ഇത്രയധികം അസഹിഷ്ണുത പുലർത്തുന്നതും വിദ്വേഷം പരത്തുന്നതും വളരെയധികം ദുഃഖം ഉണ്ടാക്കുന്ന കാര്യമാണ്.

വാക്കുകൾ കൊണ്ടുള്ള ആക്രമണങ്ങൾക്കെതിരെയാണ് ഞാൻ ഇത് എഴുതുന്നത്.നീ പൂർവാധികം ശക്തിയോടെ തിരിച്ചുവരൂ. തീർച്ചയായും ബ്രസീലും യഥാർത്ഥ ആരാധകരും നിന്നെ സ്നേഹിക്കുന്നുണ്ട്.നിന്റെ ഗോളുകൾക്കും ഡ്രിബിളുകൾക്കും വേണ്ടി അവർ കാത്തിരിക്കുന്നു.തീർച്ചയായും നീ വിമർശകർക്കെതിരെ തിരിച്ചടിക്കുക തന്നെ ചെയ്യും. ഈ വിമർശനങ്ങൾ നിനക്കൊരു ഇന്ധനമാണ് ” ഇതാണ് റൊണാൾഡോ കുറിച്ചിട്ടുള്ളത്.

ഏതായാലും നെയ്മർ വളരെ പെട്ടെന്ന് തന്നെ കളിക്കളത്തിലേക്ക് മടങ്ങിയെത്തുമെന്നാണ് ബ്രസീലിയൻ ആരാധകർ പ്രതീക്ഷിക്കുന്നത്.