നിലവിൽ ലോകത്തിലെ ഏറ്റവും മികച്ച താരം നെയ്മറാണെന്ന് മുൻ ബ്രസീൽ താരം!

നിലവിൽ ഫുട്ബോൾ ലോകത്തെ ഏറ്റവും മികച്ച താരമാണ് നെയ്മറെന്ന് മുൻ ബ്രസീലിയൻ താരമായ കയോ റിബയ്റോ. കഴിഞ്ഞ ദിവസം ബ്രസീലിയൻ ഷോ ആയ പാനിക്കോ ജോവേം പാൻ എന്ന പരിപാടിയിലാണ് ഇദ്ദേഹം ഈ അഭിപ്രായവുമായി രംഗത്തുവന്നത്. നിലവിൽ മെസ്സിയെക്കാളും റൊണാൾഡോ യെക്കാളും മികച്ച കളി കാഴ്ചവെക്കുന്നത് നെയ്മറാണ് എന്നാണ് ഇദ്ദേഹത്തിന്റെ അഭിപ്രായം. ഈ സീസണിൽ പിഎസ്ജിക്ക്‌ വേണ്ടി മികച്ച പ്രകടനമാണ് താരത്തിന്റെ ഭാഗത്തു നിന്നുണ്ടാവുന്നത്.ഇതിനോടകം തന്നെ 14 ഗോൾ പങ്കാളിത്തം താരം വഹിച്ചു കഴിഞ്ഞു.മുമ്പ് ബ്രസീലിന് വേണ്ടിയും ഇന്റർമിലാന് വേണ്ടിയും സാന്റോസിന് വേണ്ടിയും കളിച്ച സ്ട്രൈക്കർ ആണിദ്ദേഹം. എന്നാൽ നെയ്മറുടെ ചില പെരുമാറ്റങ്ങളോട് ഇദ്ദേഹത്തിന് യോജിപ്പില്ല.

” നെയ്മറുടെ ചില പെരുമാറ്റങ്ങളോടോ പ്രവർത്തനങ്ങളോടോ നമുക്ക് യോജിക്കാൻ കഴിയില്ല. പക്ഷെ കളത്തിനകത്ത് അദ്ദേഹമൊരു വജ്രായുധമാണ്. നിലവിൽ ലോകത്തിലെ ഏറ്റവും മികച്ച താരമാണ് നെയ്മർ. ക്രിസ്റ്റ്യാനോ റൊണാൾഡോയും ലയണൽ മെസ്സിയും ബോൾ കൊണ്ട് കളിക്കുന്നതിലേറെ കൂടുതൽ നെയ്മർ കളിക്കുന്നുണ്ട് ” കയോ പറഞ്ഞു. കഴിഞ്ഞ മോന്റെപെല്ലിയറിനെതിരെയുള്ള മത്സരത്തിൽ നെയ്മർ ജൂനിയർ ഗോൾ കണ്ടെത്തിയിരുന്നു.ഇനി ലോറിയന്റിനെതിരെയാണ് പിഎസ്ജിയുടെ അടുത്ത മത്സരം.