നല്ലൊരു പരീക്ഷണമായിരിക്കും, എല്ലാ മുൻകരുതലുകളും എടുക്കും:ഇക്വഡോറിനെ കുറിച്ച് സ്കലോണി!

ഇന്ന് നടക്കുന്ന അന്താരാഷ്ട്ര സൗഹൃദ മത്സരത്തിൽ ലോക ചാമ്പ്യന്മാരായ അർജന്റീന കളിക്കളത്തിലേക്ക് ഇറങ്ങുന്നുണ്ട്. എതിരാളികൾ ഇക്വഡോറാണ്. നാളെ പുലർച്ചെ ഇന്ത്യൻ സമയം 4:30നാണ് ഈയൊരു മത്സരം അരങ്ങേറുക. അമേരിക്കയിലെ ഷിക്കാഗോയിൽ വെച്ചുകൊണ്ടാണ് ഈ മത്സരം നടക്കുക.മത്സരത്തിൽ മെസ്സി സ്റ്റാർട്ടിങ് ഇലവനിൽ ഉണ്ടാവാൻ സാധ്യതയില്ല. പകരക്കാരന്റെ റോളിലായിരിക്കും മെസ്സി കളിക്കളത്തിലേക്ക് വരിക.

ഏതായാലും ഈ മത്സരത്തെക്കുറിച്ച് ചില കാര്യങ്ങൾ അർജന്റീനയുടെ പരിശീലകനായ ലയണൽ സ്‌കലോണി ഇപ്പോൾ പങ്കുവെച്ചിട്ടുണ്ട്. അതായത് ഈ മത്സരം ഒരു കടുത്ത പരീക്ഷണമായിരിക്കുമെന്നും എല്ലാവിധ മുൻകരുതലുകളും തങ്ങൾ എടുക്കുമെന്നുമാണ് സ്‌കലോണി പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ TYC റിപോർട്ട് ചെയ്തിരിക്കുന്നത് ഇങ്ങനെയാണ്.

” വ്യക്തമായ ആശയങ്ങളോട് കൂടിയാണ് ഞങ്ങൾ ഈ മത്സരത്തിന് വരുന്നത്.ഞങ്ങൾ വളരെയധികം പോസിറ്റീവാണ്. എന്തെന്നാൽ എല്ലാ മത്സരങ്ങളിലും മികച്ച രൂപത്തിൽ പോരാടുന്ന ഒരു ടീം ഞങ്ങൾക്കുണ്ട്.ഞങ്ങൾ എന്തിനാണ് ഇവിടെ എത്തിയിട്ടുള്ളത് എന്നത് പിന്നീട് ഫുട്ബോൾ തന്നെ പറയും. കോപ്പ അമേരിക്ക എപ്പോഴും ബുദ്ധിമുട്ടുള്ള ഒന്നാണ്.കാരണം സൗത്ത് അമേരിക്കൻ ടീമുകൾ നിങ്ങൾക്ക് ഒന്നും വെറുതെ തരില്ല.ഇക്വഡോർ കടുത്ത എതിരാളികളാണ്, മികച്ച കാര്യങ്ങൾ ചെയ്യാൻ അവർക്ക് സാധിക്കും. അതുകൊണ്ടുതന്നെ ഈ മത്സരം മികച്ച ഒരു പരീക്ഷണമായിരിക്കും. മാത്രമല്ല കൂടുതൽ താരങ്ങൾക്ക് സമയം നൽകാനുള്ള ഒരു അവസരമായി കൊണ്ട് ഞങ്ങൾ ഇതിനെ ഉപയോഗപ്പെടുത്തുകയും ചെയ്യും.എല്ലാവിധ മുൻകരുതലുകളും ഞങ്ങൾ എടുത്തിട്ടുണ്ട്,മികച്ച പ്രകടനം ഞങ്ങൾക്ക് പുറത്തെടുക്കേണ്ടതുണ്ട്. തീർച്ചയായും ആവശ്യത്തിന് അനുസരിച്ചുള്ള മികച്ച പ്രകടനം ഞങ്ങളുടെ ഭാഗത്ത് നിന്നുണ്ടാകും “ഇതാണ് അർജന്റീനയുടെ പരിശീലകൻ പറഞ്ഞിട്ടുള്ളത്.

ഇക്വഡോറിനെതിരെയുള്ള മത്സരത്തിന് ശേഷം അർജന്റീന ഗ്വാട്ടിമാലക്കെതിരെ ഒരു സൗഹൃദ മത്സരം കളിക്കുന്നുണ്ട്. അതിന് ശേഷമാണ് കോപ്പ അമേരിക്കയിൽ മെസ്സിയും സംഘവും ഇറങ്ങുക. കാനഡ,ചിലി,പെറു എന്നിവരാണ് കോപ്പ അമേരിക്ക ഗ്രൂപ്പ് ഘട്ടത്തിൽ അർജന്റീനയുടെ എതിരാളികൾ.