താരങ്ങളെ വിമർശിക്കില്ല, ഞങ്ങൾ തിരിച്ചു വരും: സ്കലോണി

ഇന്ന് നടന്ന വേൾഡ് കപ്പ് യോഗ്യത മത്സരത്തിൽ അർജന്റീന ഞെട്ടിക്കുന്ന ഒരു തോൽവി ഏറ്റുവാങ്ങേണ്ടി വന്നിരുന്നു.പരാഗ്വയാണ് സ്വന്തം മൈതാനത്ത് അർജന്റീനയെ പരാജയപ്പെടുത്തിയത്. ഒന്നിനെതിരെ 2 ഗോളുകൾക്കായിരുന്നു പരാഗ്വയുടെ വിജയം.ലൗറ്ററോ മാർട്ടിനസിലൂടെ അർജന്റീനയാണ് ആദ്യം മുന്നിൽ എത്തിയത്. എന്നാൽ രണ്ടു ഗോളുകൾ തിരിച്ചടിച്ചുകൊണ്ട് പരാഗ്വ വിജയം സ്വന്തമാക്കുകയായിരുന്നു.

അർജന്റീനക്ക് ഇത് ബുദ്ധിമുട്ടേറിയ സമയമാണ്.അവസാനമായി കളിച്ച നാലു മത്സരങ്ങളിൽ ഒരെണ്ണത്തിൽ മാത്രമാണ് വിജയിക്കാൻ അവർക്ക് കഴിഞ്ഞിട്ടുള്ളത്. എന്നാൽ ഇതിന്റെ പേരിൽ താരങ്ങളെ താൻ കുറ്റപ്പെടുത്തില്ല എന്ന് അർജന്റീനയുടെ പരിശീലകനായ സ്‌കലോണി പറഞ്ഞിട്ടുണ്ട്.ടീം തിരിച്ചുവരും എന്നുള്ള ശുഭപ്രതീക്ഷയും അദ്ദേഹം പങ്കുവെച്ചിട്ടുണ്ട്.സ്‌കലോണിയുടെ വാക്കുകൾ ഇങ്ങനെയാണ്.

” ഞാൻ എന്റെ താരങ്ങളെ വിമർശിക്കാനല്ല ഇവിടെയുള്ളത്. അവരെ പിന്തുണക്കാനാണ് ഇവിടെയുള്ളത്.ഇത്തരം മത്സരങ്ങൾ താരങ്ങൾക്ക് നല്ലതാണ്.പ്രത്യേകിച്ച് മിനുട്ടുകൾ വേണ്ടത്ര ലഭിക്കാത്തവർക്ക്. മത്സരം ബുദ്ധിമുട്ടാകും എന്നത് ഞങ്ങൾക്കറിയാമായിരുന്നു. താരങ്ങൾക്ക് ഞങ്ങൾ ആത്മവിശ്വാസം പകർന്നു നൽകും.ആദ്യപകുതിയിൽ ഞങ്ങൾ മികച്ച പ്രകടനം നടത്തി.പക്ഷേ അവരുടെ ഗോളുകൾ താളം തെറ്റിക്കുകയായിരുന്നു.എതിരാളികളെ ഞങ്ങൾ അഭിനന്ദിക്കേണ്ടതുണ്ട്. കാരണം അവർ നന്നായി ഡിഫൻഡ് ചെയ്തു.അത് ഞങ്ങളെ ബുദ്ധിമുട്ടിലാക്കി. പക്ഷേ ടീം സ്വയം തിരിച്ചുവരും.ചില കാര്യങ്ങൾ എനിക്ക് ശരിയാക്കേണ്ടതുണ്ട്. അടുത്ത മത്സരത്തിന് ഞങ്ങൾ നല്ല രീതിയിൽ തയ്യാറെടുക്കേണ്ടതുണ്ട് “ഇതാണ് അർജന്റീനയുടെ പരിശീലകൻ പറഞ്ഞിട്ടുള്ളത്.

നിലവിൽ പോയിന്റ് പട്ടികയിൽ അർജന്റീന തന്നെയാണ് ഒന്നാം സ്ഥാനത്ത് തുടരുന്നത്. എന്നാൽ ഈയിടെ വഴങ്ങേണ്ടി വന്ന തോൽവികളും സമനിലകളും അവരെ ആശങ്കപ്പെടുത്തുന്നുണ്ട്. അർജന്റീന പൂർവാധികം ശക്തിയോടുകൂടി തിരിച്ചുവരും എന്ന് തന്നെയാണ് ആരാധകർ വിശ്വസിക്കുന്നത്. അടുത്ത മത്സരത്തിൽ പെറുവാണ് അർജന്റീനയുടെ എതിരാളികൾ.