തന്നെയും ക്രിസ്റ്റ്യാനോ റൊണാൾഡോയെയും താരതമ്യം ചെയ്യരുതെന്ന് സുനിൽ ഛേത്രി !

ഇന്ത്യൻ ജനതയുടെ അഭിമാനതാരങ്ങളിൽ ഒരാളാണ് എന്ന കാര്യത്തിൽ ആർക്കും സംശയമുണ്ടാവില്ല. വലിയ തോതിലുള്ള അവകാശവാദങ്ങൾ ഒന്നും തന്നെ ഫുട്‍ബോളിൽ ഇന്ത്യക്ക് ഉയർത്തി കാട്ടാനില്ലെങ്കിലും സുനിൽ ഛേത്രി എന്ന നാമം ഫുട്ബോൾ ലോകത്ത് ഉയർന്നു തന്നെ നിൽക്കുന്നുണ്ട്. നിലവിൽ കളിച്ചു കൊണ്ടിരിക്കുന്ന താരങ്ങളിൽ തങ്ങളുടെ രാജ്യത്തിന് വേണ്ടി ഏറ്റവും കൂടുതൽ ഗോളുകൾ നേടിയ പട്ടികയിൽ രണ്ടാമതാണ് ഛേത്രി. മുന്നിലും പിന്നിലുമുള്ളത് ഇതിഹാസതാരങ്ങളായ ക്രിസ്റ്റ്യാനോയും ലയണൽ മെസ്സിയും. ഇപ്പോഴിതാ തന്നെ ക്രിസ്റ്റ്യാനോ റൊണാൾഡോയുമായി താരതമ്യം ചെയ്യുന്നത് നിർത്തണമെന്ന് അപേക്ഷിച്ചിരിക്കുകയാണ് ഈ ഇന്ത്യൻ സൂപ്പർ താരം. സാമൂഹികമാധ്യമങ്ങളിൽ അന്താരാഷ്ട്ര ഗോളുകളുടെ അടിസ്ഥാനത്തിൽ ചിലർ താരതമ്യം ചെയ്യുന്നത് കണ്ട ഛേത്രി ഇത് തുറന്നു പറയുകയായിരുന്നു. കഴിഞ്ഞ ദിവസം ഇന്ത്യൻ ക്രിക്കറ്റ്‌ നായകൻ വിരാട് കോഹ്ലിയുമൊന്നിച്ചുള്ള ലൈവ് ഇൻസ്റ്റാഗ്രാം ചാറ്റിലാണ് ഛേത്രി ഇങ്ങനെയൊരു അഭ്യർത്ഥന നടത്തിയത്.

” എന്നെ ക്രിസ്റ്റ്യാനോയുമായിട്ടുള്ള ചില താരതമ്യങ്ങൾ ഞാൻ കണ്ടു. ആ നിമിഷം ഞാൻ സന്തോഷത്തിലാവും. അടുത്ത അഞ്ച് സെക്കന്റിന് ശേഷം ഞാനത് മറക്കും. കാരണം ഇവിടെ ഒരു താരതമ്യത്തിന്റെയും ആവിശ്യമില്ല. നിനക്ക് അതറിയാം കോഹ്ലി.. ഫുട്ബോൾ കളിക്കുന്നതിലൂടെ എനിക്ക് കിട്ടുന്ന സന്തോഷവും സ്നേഹവും അവിശ്വസനീയമാണ്. ഞാൻ എന്റെ എല്ലാം നൽകിയതിന് ശേഷം എനിക്ക് കിട്ടുന്ന ഒരു അനുഭവമാണത്.ഞാനൊരിക്കലും സ്വപ്നം കണ്ടിട്ടില്ലാത്ത ലോകത്താണ് ഞാൻ ഇപ്പോൾ ജീവിക്കുന്നത്. എല്ലാവർക്കും ഞാൻ എവിടെയാണോ വേണ്ടത് അവിടെ തന്നെയാണ് ഞാൻ ഉള്ളത് ” ഛേത്രി പറഞ്ഞു.