ഞാൻ നേരിട്ട ഏറ്റവും മികച്ച ഡിഫൻഡർ: ഇംഗ്ലണ്ട് താരത്തെ പ്രശംസിച്ച് വിനീഷ്യസ്

കഴിഞ്ഞ അന്താരാഷ്ട്ര സൗഹൃദ മത്സരത്തിൽ ഏകപക്ഷീയമായ ഒരു ഗോളിനാണ് ബ്രസീൽ ഇംഗ്ലണ്ടിനെ പരാജയപ്പെടുത്തിയത്. മത്സരത്തിൽ എൻഡ്രിക്കാണ് ബ്രസീലിന്റെ വിജയഗോൾ നേടിയത്.വിനീഷ്യസ് ജൂനിയറുടെ മുന്നേറ്റത്തിൽ നിന്നാണ് ഈ ഗോൾ പിറന്നത്. മത്സരത്തിന്റെ 80ആം മിനിറ്റിലായിരുന്നു ബ്രസീൽ വിജയഗോൾ കണ്ടെത്തിയത്. മത്സരത്തിൽ വിനീഷ്യസിനെ പൂട്ടേണ്ട ഉത്തരവാദിത്വം ഇംഗ്ലീഷ് പ്രതിരോധനിര താരമായ കെയ്ൽ വാക്കർക്കായിരുന്നു.

അദ്ദേഹം അത് നിർവഹിക്കുകയും ചെയ്തിരുന്നു. എന്നാൽ ഇരുപതാം മിനിറ്റിൽ അദ്ദേഹത്തിന് പരിക്കു മൂലം പുറത്തു പോകേണ്ടിവന്നു.തുടർന്ന് വിനീഷ്യസിനെ തടയാൻ ഇംഗ്ലണ്ടിന് കഴിയാതെ വരികയായിരുന്നു. ഏതായാലും വാക്കറെ പ്രശംസിച്ചുകൊണ്ട് വിനി തന്നെ രംഗത്ത് വന്നിട്ടുണ്ട്. താൻ നേരിട്ട്
ഏറ്റവും മികച്ച ഡിഫൻഡർ എന്നാണ് വിനീഷ്യസ് പറഞ്ഞിട്ടുള്ളത്. അദ്ദേഹത്തിന്റെ വാക്കുകൾ ഇങ്ങനെയാണ്.

“വാക്കറിന് പരിക്കേറ്റത് ദുഃഖമുണ്ടാക്കുന്ന കാര്യമാണ്. ഏത് ടീമിന്റെ താരമാണെങ്കിലും പരിക്ക് കാരണം പുറത്തു പോകേണ്ടി വരുന്നത് ദുഃഖകരമായ കാര്യമാണ്.അത് ആ താരത്തെ സംബന്ധിച്ചിടത്തോളം മാത്രമല്ല,ടീമിനെ സംബന്ധിച്ചിടത്തോളവും ദുഃഖകരമാണ്. മികച്ച താരങ്ങൾക്കെതിരെ കളിക്കാൻ ആഗ്രഹിക്കുന്നവരാണ് ഞങ്ങൾ.ഞാൻ എപ്പോഴും പറയുന്ന കാര്യമാണ്, ഞാൻ നേരത്തെ ഏറ്റവും മികച്ച പ്രതിരോധനിരതാരമാണ് വാക്കർ. അദ്ദേഹത്തിനെതിരെയുള്ളത് എപ്പോഴും മികച്ച ഒരു പോരാട്ടമാണ്. ഞാൻ അദ്ദേഹത്തെയും അദ്ദേഹം എന്നെയും വളരെയധികം ബഹുമാനിക്കുന്നുണ്ട്. തീർച്ചയായും മികച്ച ഒരു പ്രതിരോധനിരതാരമാണ് ഇംഗ്ലണ്ടിനുള്ളത് ” ഇതാണ് വിനീഷ്യസ് പറഞ്ഞിട്ടുള്ളത്.

നേരത്തെ ക്ലബ്ബ് തലത്തിലും വിനീഷ്യസും വാക്കറും തമ്മിൽ ഏറ്റുമുട്ടിയിട്ടുണ്ട്. ഇനി യുവേഫ ചാമ്പ്യൻസ് ലീഗിൽ ഇരുവരും തമ്മിൽ പരസ്പരം മുഖാമുഖം വരും. മാഞ്ചസ്റ്റർ സിറ്റിയും റയൽ മാഡ്രിഡും തമ്മിലാണ് ചാമ്പ്യൻസ് ലീഗ് ക്വാർട്ടർ ഫൈനൽ പോരാട്ടത്തിൽ ഏറ്റുമുട്ടുന്നത്.