ഞങ്ങൾക്കും കിരീടം നേടാൻ കഴിയും, എന്നാൽ ഫേവറേറ്റുകൾ ആ ടീമാണ് : പോർച്ചുഗൽ പരിശീലകൻ.

ഖത്തർ വേൾഡ് കപ്പിനുള്ള തങ്ങളുടെ 26 അംഗ സ്‌ക്വാഡിനെ പോർച്ചുഗീസ് പരിശീലകനായ ഫെർണാണ്ടൊ സാൻഡോസ് കഴിഞ്ഞ ദിവസം പ്രഖ്യാപിച്ചിരുന്നു. മികച്ച താരങ്ങളെ ഉൾപ്പെടുത്തിക്കൊണ്ട് തന്നെയാണ് സാന്റോസ്‌ സ്‌ക്വാഡ് പുറത്തുവിട്ടിട്ടുള്ളത്. സൂപ്പർ താരങ്ങളായ ക്രിസ്റ്റ്യാനോ റൊണാൾഡോ,ബ്രൂണോ ഫെർണാണ്ടസ്,ബെർണാഡോ സിൽവ എന്നിവരിലൊക്കെയാണ് വലിയ രൂപത്തിൽ ആരാധകർ പ്രതീക്ഷകൾ വെച്ചുപുലർത്തുന്നത്.

ഏതായാലും ഈ ടീമിനെ പ്രഖ്യാപിച്ചതിനുശേഷം ചില കാര്യങ്ങൾ പോർച്ചുഗീസ് പരിശീലകനായ സാന്റോസ് പറഞ്ഞിട്ടുണ്ട്.ഞങ്ങളുടെ ഈ ടീമിനെ ഖത്തർ വേൾഡ് കപ്പ് കിരീടം നേടാൻ സാധിക്കുമെന്നാണ് താൻ വിശ്വസിക്കുന്നത് എന്നാണ് ഇദ്ദേഹം പറഞ്ഞിട്ടുള്ളത്. എന്നാൽ കിരീട ഫേവറേറ്റുകൾ ഫ്രാൻസാണെന്നും സാന്റോസ് കൂട്ടിച്ചേർത്തു.അദ്ദേഹത്തിന്റെ വാക്കുകൾ ഇങ്ങനെയാണ്.

” വേൾഡ് കപ്പ് കിരീടം നേടുക എന്നുള്ളത് തന്നെയാണ് ലക്ഷ്യം.അതിനേക്കാൾ കുറഞ്ഞ ലക്ഷ്യമൊന്നും ഞങ്ങൾക്കില്ല.ഈ ടീമിനും എന്റെ താരങ്ങൾക്കും വേൾഡ് കപ്പ് കിരീടം നേടാൻ കഴിയുമെന്ന് തന്നെയാണ് ഞാൻ വിശ്വസിക്കുന്നത്. ഈ ചാമ്പ്യൻഷിപ്പിലെ ഫേവറേറ്റുകൾ ഫ്രാൻസാണ്.കഴിഞ്ഞ തവണ കിരീടം നേടിയത് അവരാണ്. എന്നിരുന്നാൽ പോലും ഞങ്ങളുടെ ടീമിനും കിരീടം നേടാൻ കഴിയുമെന്ന് ഞാൻ വിശ്വസിക്കുന്നു ” ഇതാണ് പോർച്ചുഗൽ പരിശീലകൻ പറഞ്ഞിട്ടുള്ളത്.

പോർച്ചുഗല്ലിനെ സംബന്ധിച്ചിടത്തോളം ഗ്രൂപ്പ് ഘട്ടത്തിൽ ശക്തമായ എതിരാളികളെ തന്നെയാണ് നേരിടേണ്ടത്.ഉറുഗ്വ,ഘാന,സൗത്ത് കൊറിയ എന്നിവരാണ് ഗ്രൂപ്പ് ഘട്ടത്തിൽ പോർച്ചുഗലിന്റെ എതിരാളികൾ. വേൾഡ് കപ്പിന് മുന്നേ നൈജീരിയക്കെതിരെ ഒരു സൗഹൃദ മത്സരം പോർച്ചുഗൽ കളിക്കുന്നുമുണ്ട്.