ചരിത്രം കുറിച്ചു, റെക്കോർഡുകളുടെ കളിത്തോഴനായി ക്രിസ്റ്റ്യാനോ!

ഓരോ മത്സരം ക്രിസ്റ്റ്യാനോ സമ്മാനിക്കുന്നത് ഓരോ റെക്കോർഡുകളാണ്. ഇന്നലെ യൂറോ കപ്പിൽ നടന്ന ഹങ്കറിക്കെതിരെയായ മത്സരവും അതിൽ വ്യത്യസ്ഥമായിരുന്നില്ല. ഇരട്ടഗോൾ നേട്ടത്തോടെ റൊണാൾഡോ ചരിത്രം കുറിച്ചിരിക്കുകയാണ്.ഇന്നലെ നടന്ന മത്സരത്തിന്റെ 87-ആം മിനുട്ടിലാണ് റൊണാൾഡോയുടെ ആദ്യഗോൾ പിറക്കുന്നത്. പെനാൽറ്റിയിലൂടെയായിരുന്നു ക്രിസ്റ്റ്യാനോ ഗോൾ കണ്ടെത്തിയത്. അതിന് ശേഷം ഇഞ്ചുറി ടൈമിൽ ഒരിക്കൽ കൂടി റൊണാൾഡോ തന്റെ പ്രതിഭാപാടവം വിളിച്ചോതി. ഡിഫൻഡർമാരെയും ഗോൾകീപ്പറെയും കബളിപ്പിച്ചു കൊണ്ടാണ് ക്രിസ്റ്റ്യാനോയുടെ രണ്ടാം ഗോൾ പിറന്നത്.ഈ ഗോളുകളോട് കൂടി യൂറോ കപ്പിലെ ടോപ് സ്‌കോറർ പട്ടം റൊണാൾഡോ കരസ്ഥമാക്കുകയായിരുന്നു.

യൂറോ കപ്പിന്റെ ചരിത്രത്തിൽ ഏറ്റവും കൂടുതൽ ഗോളുകൾ നേടിയ താരമെന്ന റെക്കോർഡാണ് റൊണാൾഡോ സ്വന്തം പേരിലാക്കിയത്.11 ഗോളുകളാണ് റൊണാൾഡോ യൂറോ കപ്പിൽ നേടിയിട്ടുള്ളത്. മറ്റൊരു താരവും ഇത്രയധികം ഗോളുകൾ നേടിയിട്ടില്ല. മാത്രമല്ല അഞ്ച് യൂറോ കപ്പുകൾ കളിക്കുന്ന ചരിത്രത്തിലെ ആദ്യ താരമാവാനും റൊണാൾഡോക്ക് കഴിഞ്ഞു. കൂടാതെ അഞ്ച് യൂറോ കപ്പിലും ഗോൾ നേടിയ ഏക താരം ക്രിസ്റ്റ്യാനോ റൊണാൾഡോയാണ്. ഇങ്ങനെ റെക്കോർഡുകളെല്ലാം തന്നെ സ്വന്തം പേരിലാക്കുന്ന തിരക്കിലാണ് റൊണാൾഡോ. കഴിഞ്ഞ തവണത്തെ യൂറോ കപ്പ് സ്വന്തം ഷെൽഫിൽലെത്തിക്കാൻ റൊണാൾഡോക്ക് കഴിഞ്ഞിരുന്നു.