ഗോളുമായി ലൗറ്ററോ, അപരാജിത കുതിപ്പ് തുടർന്ന് അർജന്റീന!

ഇന്ന് നടന്ന വേൾഡ് കപ്പ് യോഗ്യത മത്സരത്തിൽ നിലവിലെ കോപ്പ അമേരിക്ക ചാമ്പ്യൻമാരായ അർജന്റീനക്ക്‌ വിജയം. ഏകപക്ഷീയമായ ഒരു ഗോളിന് പെറുവിനെയാണ് അർജന്റീന പരാജയപ്പെടുത്തിയത്. സൂപ്പർ താരം ലൗറ്ററോ മാർട്ടിനെസ് നേടിയ ഗോളാണ് അർജന്റീനക്ക്‌ ജയം നൽകിയത്. ഇതോടെ അർജന്റീന പരാജയമറിയാതെ 25 മത്സരങ്ങൾ പൂർത്തിയാക്കി.നിലവിൽ 11 മത്സരങ്ങളിൽ നിന്ന് 25 പോയിന്റുള്ള അർജന്റീന പോയിന്റ് ടേബിളിൽ രണ്ടാം സ്ഥാനത്താണ്.

മെസ്സി, ലൗറ്ററോ, ഡി മരിയ എന്നിവരായിരുന്നു അർജന്റീനയുടെ മുന്നേറ്റനിരയിൽ.മത്സരത്തിന്റെ 43-ആം മിനുട്ടിലാണ് ലൗറ്ററോയുടെ ഗോൾ പിറക്കുന്നത്.മൊളീനയുടെ ക്രോസിൽ നിന്നും ഒരു തകർപ്പൻ ഹെഡറിലൂടെയാണ് ലൗറ്ററോ ഗോൾ നേടിയത്. പിന്നീടും അർജന്റീന മുന്നേറ്റങ്ങൾ സംഘടിപ്പിച്ചുവെങ്കിലും പെറു ഡിഫൻസ് തടയിടുകയായിരുന്നു.മത്സരത്തിന്റെ 66-ആം മിനുട്ടിൽ പെറുവിന് അനുകൂലമായി പെനാൽറ്റി ലഭിച്ചു.എന്നാൽ പെറു താരമായ യോട്യുൻ പെനാൽറ്റി പാഴാക്കുകയായിരുന്നു.ഇതോടെ തുടർച്ചയായ നാലാം മത്സരത്തിലും ക്ലീൻ ഷീറ്റ് നേടാൻ അർജന്റീനക്കായി.ഇനി അടുത്ത മാസം നടക്കുന്ന മത്സരത്തിൽ ഉറുഗ്വ, ബ്രസീൽ എന്നിവരാണ് അർജന്റീനയുടെ എതിരാളികൾ.