ഗോളടിച്ചു,ഭാവിയെ കുറിച്ച് സൂചന നൽകി എൻസോ ഫെർണാണ്ടസ്,പുകഴ്ത്തി പരിശീലകൻ!

ഇന്നലെ നടന്ന പോർച്ചുഗൽ കപ്പ് മത്സരത്തിൽ വിജയം നേടാൻ ബെൻഫിക്കക്ക് സാധിച്ചിരുന്നു. എതിരില്ലാത്ത രണ്ട് ഗോളുകൾക്കായിരുന്നു വർസിമിനെ പരാജയപ്പെടുത്തിയത്. ഒരു ഇടവേളക്കുശേഷം ടീമിലേക്ക് തിരിച്ചെത്തിയ അർജന്റൈൻ സൂപ്പർ താരം എൻസോ ഫെർണാണ്ടസ് മത്സരത്തിൽ ഗോൾ നേടുകയും ചെയ്തിരുന്നു.

അതിനുശേഷം താരം നടത്തിയ സെലിബ്രേഷൻ വലിയ ശ്രദ്ധ നേടിയിട്ടുണ്ട്. അതായത് തന്റെ ജേഴ്‌സിയിലെ ബെൻഫിക്ക ലോഗോയിൽ അടിക്കുകയും പിന്നീട് ഗ്രൗണ്ടിലേക്ക് വിരൽ ചൂണ്ടുകയും ചെയ്തു കൊണ്ടായിരുന്നു താരം സെലിബ്രേഷൻ നടത്തിയിരുന്നത്. അതായത് താൻ ഇവിടെ തന്നെ തുടരും എന്നുള്ള സൂചനയാണ് ഇതിലൂടെ ഈ അർജന്റീന താരം നൽകിയിട്ടുള്ളത്. മാത്രമല്ല ബെൻഫിക്ക ആരാധകരിൽ നിന്നും വലിയ അഭിനന്ദനങ്ങൾ താരത്തിന് ലഭിക്കുകയും ചെയ്തിരുന്നു.

ഈ ട്രാൻസ്ഫർ ജാലകത്തിൽ ചെൽസിയിലേക്ക് ചേക്കേറാനുള്ള ശ്രമങ്ങൾ എൻസോ ഫെർണാണ്ടസ് നടത്തിയിരുന്നു.അത് ഫലം കണ്ടിരുന്നില്ല.ചെൽസിയുമായി എഗ്രിമെന്റിൽ എത്താൻ താരത്തിന് സാധിച്ചിരുന്നുവെങ്കിലും റിലീസ് ക്ലോസ് നൽകാനാവാതെ ചെൽസി പിന്മാറുകയായിരുന്നു. പക്ഷേ ബെൻഫിക്കയോടുള്ള തന്റെ ഇഷ്ടത്തിന് ഒരു കുറവും സംഭവിച്ചിട്ടില്ല എന്നാണ് ഇന്നലെ ആരാധകരോട് ഈ സെലിബ്രേഷനിലൂടെ എൻസോ ഫെർണാണ്ടസ് വ്യക്തമാക്കിയിട്ടുള്ളത്.

ഇതേക്കുറിച്ച് ചില കാര്യങ്ങൾ ബെൻഫിക്ക പരിശീലകൻ പറഞ്ഞിട്ടുണ്ട്.അതിങ്ങനെയാണ്.

” വീണ്ടും അദ്ദേഹത്തിന് കളിക്കാൻ കഴിഞ്ഞു എന്നുള്ളത് വളരെ പ്രധാനപ്പെട്ട കാര്യമാണ്. അദ്ദേഹത്തിന്റെ വ്യക്തിത്വത്തിലോ സവിശേഷതയിലോ എനിക്ക് യാതൊരുവിധ സംശയങ്ങളും ഉണ്ടായിരുന്നില്ല. ഒരു മികച്ച വ്യക്തിയും ഒരു മികച്ച ഫുട്ബോൾ താരവും ആണ് അദ്ദേഹം. തീർച്ചയായും ഈ സീസണിന്റെ അവസാനം വരെ അദ്ദേഹം എന്റെ പരിഗണനയിൽ തന്നെയുണ്ടാവും ” ഇതാണ് ബെൻഫിക്ക പരിശീലകനായ റോജർ ഷിമിഡ് പറഞ്ഞിട്ടുള്ളത്.

ഏതായാലും കഴിഞ്ഞ വേൾഡ് കപ്പിലെ അതേ മികവ് അദ്ദേഹം ക്ലബ്ബിലും തുടരുമെന്നാണ് ആരാധകർ പ്രതീക്ഷിക്കുന്നത്.