അർജന്റൈൻ ടീമിനൊപ്പം ഖത്തർ വേൾഡ് കപ്പിനുണ്ടാവും : അഗ്വേറോ

ഈ സീസണിലായിരുന്നു അർജന്റൈൻ സൂപ്പർ താരമായ സെർജിയോ അഗ്വേറോക്ക് അപ്രതീക്ഷിതമായി ഫുട്ബോളിൽ നിന്നും വിരമിക്കേണ്ടി വന്നത്.ആരോഗ്യപ്രശ്നങ്ങൾ കാരണമായിരുന്നു അഗ്വേറോ നേരത്തെ തന്നെ ഫുട്ബോളിനോട് വിടചൊല്ലിയത്.നിലവിൽ താരം വിശ്രമജീവിതം നയിക്കുകയാണ്.

എന്നാൽ കഴിഞ്ഞ ദിവസം വളരെ പ്രധാനപ്പെട്ട ഒരു കാര്യം സെർജിയോ അഗ്വേറോ പങ്കുവെച്ചിട്ടുണ്ട്.അതായത് വരുന്ന ഖത്തർ വേൾഡ് കപ്പിനുള്ള അർജന്റീന ടീമിനൊപ്പം താനുമുണ്ടാവുമെന്നുള്ള സൂചനകളാണ് അഗ്വേറോ നൽകിയിട്ടുള്ളത്.കോച്ചിങ് സ്റ്റാഫിലായിരിക്കും അഗ്വേറോയുടെ സാന്നിധ്യമുണ്ടാവുക.ഇതേ കുറിച്ച് അഗ്വേറോ റേഡിയോ ടെന്നിനോട് പറഞ്ഞത് ഇങ്ങനെയാണ്.

” ഞാൻ ഖത്തർ വേൾഡ് കപ്പിന് പോവാനുള്ള ഒരുക്കത്തിലാണ്. ഈ ആഴ്ച്ച ഞങ്ങളൊരു യോഗം വിളിച്ചു ചേർത്തിട്ടുണ്ട്. ഞാൻ അവിടെ ഉണ്ടാവും.ഞാൻ കോച്ചിംഗ് സ്റ്റാഫിൽ ചേരുന്നതുമായി ബന്ധപ്പെട്ട ഒരു ഐഡിയ ഉയർന്നുവന്നിട്ടുണ്ട്.ഞാൻ സ്‌കലോണിയുമായും ടാപ്പിയയുമായും സംസാരിച്ചിരുന്നു. ഞങ്ങൾ അതിനു വേണ്ടി ശ്രമിച്ചു കൊണ്ടിരിക്കുകയാണ്.തീർച്ചയായും വേൾഡ് കപ്പിൽ അർജന്റീന ടീമിൽ കളിക്കാൻ ഞാൻ ആഗ്രഹിച്ചിരുന്നു.പക്ഷെ എന്ത് ചെയ്യാൻ കഴിയും? യാഥാർഥ്യമെന്തെന്നാൽ ഞാൻ ഞാൻ ടീമിനൊപ്പമുണ്ടാവും.അവരെ പ്രചോദിപ്പിക്കാൻ എനിക്ക് കഴിയും ” ഇതാണ് അഗ്വേറോ പറഞ്ഞത്.

നേരത്തെ തന്നെ വേൾഡ് കപ്പിന് അർജന്റീന യോഗ്യത ഉറപ്പാക്കിയിരുന്നു. നിലവിലെ കോപ്പ അമേരിക്ക ചാമ്പ്യൻമാരായ അർജന്റീന ഇത്തവണ വലിയ പ്രതീക്ഷയിലാണ്.