ക്രിസ്റ്റ്യാനോ റൊണാൾഡോ ലിസ്ബണിൽ!

സൂപ്പർ താരം ക്രിസ്റ്റ്യാനോ റൊണാൾഡോ പോർച്ചുഗീസ് തലസ്ഥാനമായ ലിസ്ബണിലെത്തി. ഇറ്റാലിയൻ മാധ്യമമായ ട്യൂട്ടോമെർക്കാറ്റോ വെബ് ആണ് റൊണാൾഡോ ടുറിൻ വിട്ട് കൊണ്ട് പോർച്ചുഗല്ലിലേക്ക് പറന്ന കാര്യം റിപ്പോർട്ട്‌ ചെയ്തത്. താരത്തിന്റെ സ്വകാര്യവിമാനത്തിലാണ് റൊണാൾഡോ പോർച്ചുഗല്ലിൽ എത്തിയത്. ഇനി പോർച്ചുഗല്ലിനോടൊപ്പം യൂറോ കപ്പിനുള്ള ഒരുക്കങ്ങൾ റൊണാൾഡോ നടത്തും യൂറോ കപ്പിനുള്ള പോർച്ചുഗീസ് സ്‌ക്വാഡിന്റെ പ്രധാന ആകർഷണം തന്നെ റൊണാൾഡോയാണ്. യൂറോ കിരീടം നിലനിർത്താനുറച്ചാവും സാന്റോസിന്റെ ശിഷ്യൻമാർ കളത്തിലേക്കിറങ്ങുക.

എന്നാൽ പോർച്ചുഗല്ലിന് കാര്യങ്ങൾ എളുപ്പമാവില്ല.മരണഗ്രൂപ്പായാ ഗ്രൂപ്പ്‌ എഫിലാണ് പറങ്കിപ്പടയുടെ സ്ഥാനം. ജർമ്മനിയും ഫ്രാൻസുമാണ് പോർച്ചുഗല്ലിന് വെല്ലുവിളി സൃഷ്ടിക്കുക. ഹങ്കറിയാണ് ഗ്രൂപ്പിലെ മറ്റൊരു അംഗം.ജൂൺ 15-ന് ഹങ്കറിക്കെതിരെയാണ് പോർച്ചുഗല്ലിന്റെ ആദ്യ അങ്കം.

അതേസമയം റൊണാൾഡോയെ സ്പോർട്ടിങ് ലിസ്ബണിലേക്ക് എത്തിക്കാൻ ശ്രമിക്കുമെന്ന് താരത്തിന്റെ മാതാവ് തുറന്നു പറഞ്ഞിരുന്നു. എന്നാൽ ഇക്കാര്യം ഏജന്റ് നിരസിക്കുകയും ചെയ്തിരുന്നു. പക്ഷേ റൊണാൾഡോ യുവന്റസ് വിട്ടേക്കുമെന്നുള്ള കിംവദന്തി ശക്തിയോടെ പ്രചരിക്കുന്നുണ്ട്. റൊണാൾഡോ പുതുതായി പോസ്റ്റ്‌ ചെയ്ത സന്ദേശം ഇതിന് ആക്കം വർധിപ്പിച്ചിട്ടുണ്ട്.